Այսօր «Արժանապատիվ հայրենիք» նախաձեռնությունը Ազատության հրապարակում հրավիրել էր ասուլիս՝ իրազեկելու երեկ տեղի ունեցած ակցիայի, ինչպես նաև նախաձեռնության հետագա անելիքների մասին: Թեև երեկ երթը նախատեսված էր ավարտել նամակների՝ ԱԺ և ՀՀ նախագահական նստավայր հանձնման արարողությամբ, որտեղ պահանջվում էր կասեցնել Հայաստանի՝ ՄՄ անդամակցության գործընթացը, սակայն ոստիկանությունը բերման ենթարկեց 110 քաղաքացիների՝ խախտելով ՀՀ օրենսդրությունը և մարդու հիմնարար իրավունքները:
Նախաձեռնության առաջիկա անելիքներն են՝ երկու նամակների հանձնումը՝ ՀՀ ԱԺ և ՀՀ նախագահական, որտեղ հայտնելու են, որ իրենց գործողությունները լինելու են շարունակական և ավարտվելու են Հայաստանի՝ ՄՄ-ի բռնակցման գործընթացի կասեցմամբ:
Նախաձեռնության անդամները նշեցին, որ առաջիկայում նախատեսվում են տարբեր միջոցառումներ:
Մտադի՞ր են արդյոք պահանջել Սերժ Սարգսյանի հրաժարականը՝ հարցին նախաձեռնության անդամները պատասխանեցին, որ այս հայտարարության մեջ դեռ այդ պահանջը չկա, բայց դա ևս չի բացառվում:
Մեր այն հարցին՝ արդյոք հանրության արձագանքը ադեկվա՞տ էր, նախաձեռնության անդամներից Նարեկ Սամսոնյանը նշեց, որ իր կարծիքով՝ ոչ, ադեկվատ չէր, բայց մեր գործողությունները հենց միտված են հանրության հետ աշխատանքին:
Նրա խոսքով՝ այսօր մեր բոլոր քաղաքական ուժերի փաստացի տապալված լինելու պատճառն այն է, որ բացակայում է հանրության հետ աշխատանքը: «Մեր խնդիրներից մեկը դա է լինելու՝ փորձել համախմբել հասարակությանը, բացատրել, նոր գործողություններ կատարել»:
Մեր այն դիտարկմանը, որ շատերը ակցիան համարում էին անկազմակերպ, Նարեկ Սամսոնյանը նշեց. «Չենք նստել և որոշել, թե ամեն քայլափոխի ինչ-որ մեկը կլինի, որը կարգադրություններ կանի, մենք նշել ենք երթի ձևաչափը, ճանապարհը»:
«Նրանց մեջ կային մարդիկ, ովքեր բացահայտ սադրում էին, որոնց ես չէի ճանաչում, կարող էին լինել նաև ոստիկանության աշխատակիցներ»,- ասաց նա: