Չիլիի դատարանը երկուշաբթի հանել է կալանքը նախկին բռնապետ Աուգուստո Պինոչետի ունեցվածքի վրայից: Այս մասին հայտնում է France Presse գործակալությունը: 2006 թվականին կյանքի 92-րդ տարում տնային կալանքի տակ մահացած բռնապետի ունեցվածքի (դրա մեջ ներառվում է 23 տուն) նկատմամբ կալանքը հանելու խնդրանքով դատարան էին դիմել Պինոչետի ժառանգները՝ այրին ու 5 զավակները: Այս մասին հայտնում է Lenta.ru-ն:
Նախկին բռնապետի ունեցվածքը կալանքի տակ էր դրվել դրա ծագման աղբյուրները հետաքննելու շրջանակում: Պինոչետի և նրա ընտանիքի անօրինական եկամուտների մասին գործը հարուցվել էր 2004 թվականին՝ ամերիկյան կողմի նախաձեռնությամբ: Աուդիտորները Պինոչետի կարողությունը գնահատել էին 21.3 մլն դոլար, ընդ որում՝ 17.9 միլիոնի ծագումն անհայտ է մնացել: 2007-ին դատարանը Պինոչետի հարազատներին անմեղ է ճանաչել նախկին բռնապետի անօրինական եկամուտների գործով:
Նախկին բռնապետի ունեցվածքի ծագման մասին գործով նոր դատական լսումներն սկսվել էին 2013-ին: Այս անգամ Պինոչետի ընտանիքի անդամները գործով չեն անցել: Գործով մեղադրյալ են եղել 6 նախկին բարձրաստիճան զինվորականներ, որոնց 10 տարվա ազատազրկում է սպառնացել, սակայն 2013-ի օգոստոսի սկզբին Պինոչետի անօրինական եկամուտների մասին գործը դատարանը փակել է:
Չիլիի գլխավոր դատախազությունը բողոքարկում է ներկայացրել և պահանջել գործի հետաքննության վերսկսում: Դատախազության բողոքարկման առնչությամբ որոշում դեռևս չի կայացվել: Ենթադրվում էր, որ մինչ բողոքարկման քննման ավարտը Պինոչետի ունեցվածքը կալանքի տակ կգտնվի:
Պինոչետին կասկածում էին քաղաքական հակառակորդների սպանության ու կոռուպցիայի համար, սակայն Չիլիի նախկին բռնապետը մինչ դատը չապրեց:
