Այսօր բացի Մաքսային միությանը Հայաստանի միանալու դեմ տարաբնույթ ակցիաներից՝ ԱԺ-ի մոտ բողոքի ակցիա են կազմակերպել պարտադիր կուտակային կենսաթոշակային համակարգի դեմ պայքարողները: Նրանց ցուցապաստառների վրա գրված է՝ դեմ եմ պարտադիրին:
«Առաջին լրատվական»-ի հետ զրույցում ակցիայի մասնակիցներից Կարենը նշեց, որ ակցիան կապ չունի Պուտինի՝ Հայաստան կատարած այցի հետ, պարզապես այս ակցիայով ևս մեկ անգամ հաստատում են իրենց պահանջները: Նա նշեց, որ եթե ոտնահարվում են մեր շահերը, իրավունքները, միակ ելքը պայքարն է:
Մասնակիցներից Արման Ավետիսյանն էլ նշեց, որ տեղեկացել են, որ այսօր ԱԺ-ում քննարկվելու է հարցը:
«Անձամբ հույս չեմ կապում քննարկումների հետ. պետք է պայքարենք: Ամեն ինչ կապված է քաղաքացուց: Եթե նա այնպես է ձայնը բարձրացնում, որ լսի, ուրեմն կլսվի: Արվում է ամեն ինչ, որ հնարավոր լինի արդյունքի հասնել, և կարծում եմ՝ սա այն հարցն է, որ բոլորին պետք է հետաքրքրի, և բոլորը պետք է դուրս գան պայքարի իրենց իրավունքների համար»,-ասաց նա՝ հավելելով, որ մարդկանց այն շերտը, որը հիասթափված է, ի վերջո հասկանում են, որ սա իրենց երկիրն է, որտեղ պետք է պայքարել:
Նա նշեց, որ սա իրենց երրորդ ակցիան է: «Հասնելու ենք նրան, որ օրենքը կա՛մ կասեցվի, կա՛մ ձևափոխվի, կա՛մ վերացվի ընդհանրապես»,- ասաց նա:
