Իրաքի ցանկացած տարածքից, այդ թվում նաև՝ Հյուսիսային Իրաքի քրդական ինքնավարությունից, նավթի մատակարարումը Թուրքիա կիրականացվի միայն Բաղդադի կենտրոնական կառավարության հավանությամբ: Ինչպես հաղորդում է Reuters-ը, այս մասին հայտարարել է էներգետիկայի հարցով Իրաքի վարչապետի տեղակալ Հուսեյն Ալ-Շահրիստանին Իրաքի մայրաքաղաքում Թուրքիայի էներգետիկայի նախարար Թաներ Յըլդըզի հետ բանակցություններից հետո:
«Մենք համաձայնեցրել ենք, որ ցանկացած արտահանում պետք է հաստատվի Իրաքի կառավարության կողմից, և մենք դեռևս կքննարկենք այս մեխանիզմը»,- ասել է Ալ-Շահրիստանին:
Ավելի վաղ հաղորդվել է, որ Թուրքիան պայմանավորվածություն է ձեռք բերել Իրաքյան Քրդստանի հետ նավթագազային ոլորտում, սակայն դեռևս չի ստորագրել այն: Իրաքյան ինքնավարության ղեկավարությունը մտադիր է մոտակա ժամանակներս գործարկել նավթամուղ, որը Թուրքիայով կանցնի Եվրոպայի երկրներ: Պաշտոնական Բաղդադը դեմ է Քրդստանի ինքնուրույն որոշումներին՝ կապված նավթային ռեսուրսների հետ, որոնք տեղակայված են իր տարածքում:
