Շաքարավազի ներմուծումն ու արտադրությունը նվազում է, գինը` իջնում: Այսպես, հունվար- սեպտեմբերին` 2012թ.-ի նույն ամիսների համեմատ շաքարավազի ներմուծումը նվազել է 3.3 տոկոսով: Այս նվազմանը զուգահեռ նվազել է նաև Հայաստան ներմուծված շաքարավազի մաքսային արժեքը. 1կգ հաշվով մոտ 20 տոկոսով և հասել 52 սենթի:
Նույն ժամանակում նվազել է նաև Հայաստանում արտադրվող շաքարի ծավալը` 3,4 տոկոսով և հասել 43 հազար 917 տոննայի:
Եվ չնայած ներմուծման ու արտադրության նվազմանը, շաքարավազի գինը մեր երկրում նվազել է` մաքսային արժեքի նվազմանը զուգահեռ: Նույն ժամանակում շաքարավազի գինը Հայաստանում իջել է 10.7 տոկոսով, այսինքն` 2 անգամ ավելի դանդաղ, քան մաքսային արժեքի անկումն է և հասել 1կգ դիմաց 384-418 դրամի: Ստացվում է, որ եթե 1կգ մաքսային արժեքը 52 սենթ է, այսինքն` մոտ 210 դրամ, ապա Հայաստանում շաքարավազը վաճառվում է 80-99 տոկոսով ավելի թանկ, քան նրա մաքսային արժեքն է:
Շաքարավազը հիմնականում Հայաստան է ներմուծվում Բրազիլիայից և Ուկրաինայից:
