Ավան և Նոր Նորք վարչական շրջանների ընդհանուր իրավասության դատարանում Սամվել Ուզունյանի նախագահությամբ ավարտվել է ավազակային հարձակում կատարած խմբի գործով դատավարությունը:
Ըստ դատական ակտի՝ եղբայրներ Վարդան և Դավիթ Սարգսյանները զբաղվել են առևտրով, ապա Էջմիածին քաղաքում բացել են «Դ և Վ» տաքսի ծառայությունը, որի համար ապառիկով մեքենաներ են գնել, մեծ պարտքեր կուտակել:
2011 թվականից նրանք չեն կարողացել վճարել պարտքերը, իսկ պարտքատերերը անընդհատ անհանգստացրել են նրանց, պահանջել իրենց գումարները:
Սարգսյան եղբայրները ելքեր են փնտրել՝ ստեղծված իրավիճակից դուրս գալու համար:
Այդ նույն ժամանակ տաքսի ծառայությունում որպես վարորդ աշխատող Ռադիկ Հովագիմյանի որդին՝ ոստիկանության զորքերի պայմանագրային զինծառայող, կրտսեր սերժանտ Գևորգ Հովակիմյանը հաճախ այցելել է տաքսի ծառայություն:
Խոսակցությունների ընթացքում Վարդան Սարգսյանը Գևորգ Հովակիմյանից տեղեկացել է, որ ոստիկանության զորքերի տվյալ զորամասի աշխատավարձերը բաժանում են կանխիկ ու զորամաս են բերում սովորական ավտոմեքենայով:
Վարդան Սարգսյանը մտադրվել է ավազակային հարձակմամբ հափշտակել այդ գումարները:
Իր մտադրության մասին նա ծառայության գրասենյակում տեղյակ է պահել Ռադիկ Հովագիմյանին, Գևորգ Հովակիմյանին և իրենց մտերիմ Գևորգ Աբրահամյանին:
Վերջիններս համաձայնել են մասնակցել ավազակային հարձակմանը:
Կայացել են խմբի մի քանի հանդիպումներ, որոնց ժամանակ Գևորգ Հովակիմյանը մանրամասն տեղեկություններ է տվել զորամասի աշխատավարձերը բաժանելու վերաբերյալ:
Նա ասել է, որ գումարները զորամաս են բերվում կանխիկ, «ԳԱԶ 24-10» ավտոմեքենայով, 3 անձանց ուղեկցությամբ, որոնցից մեկն է միայն զինված:
Հովակիմյանը նշել է այն վայրը, որտեղից զորամասի հաշվապահն ու գանձապահը ստանում են գումարը, տեղափոխում: Հայտնել է տեղափոխման երթուղին, գումարի մոտավոր չափը:
Վարդան Սարգսյանը ծրագրել է հարձակումը, յուրաքանչյուրին բացատրել է իր անելիքը՝ կատարել է դերաբաշխում, ստեղծել «կայուն կազմակերպված խումբ»:
Այնուհետև Վարդանը եղբոր հետ ձեռնամուխ է եղել հանցագործության համար անհրաժեշտ միջոցներ՝ զենք, դիմակներ, ավտոմեքենա հայթայթելու գործին:
2011 թվականի ապրիլին Վարդան Սարգսյանը 400 դոլարով գնել է սպիտակ «Մոսկվիչ»: Բացի իրենց ունեցած մեկ հատ գազային ատրճանակից, ձեռք են բերել մեկ հատ էլ օդաճնշիչ ատրճանակ:
Հանցավոր խմբի անդամները ապրիլի 23-ից մինչև 27-ը «Մոսկվիչը» կայանել են ոստիկանության զորքերի վարչության շենքի հարակից տարածքում, իսկ Հովագիմյանի վարած «ՎԱԶ-2107» մեքենայով դարանակալել են զորամասի մոտ ու հետևել աշխատավարձի գումարը տեղափոխող մեքենային:
Գևորգ Հովակիմյանը տեղեկացրել է, որ աշխատավարձերի տեղափոխումը հնարավոր է ապրիլի 27-ին:
Այդ օրը՝ կեսօրին, տեսնելով, որ «ԳԱԶ 24-10» ավտոմեքենան դուրս է գալիս զորամասի տարածքից, մեքենայի սրահում էլ բացի վարորդից երկու կին ու մի տղամարդ կան, հանցախմբի անդամները հասկացել են, որ նրանք ուղևորվում են գումարը բերելու:
Հովագիմյանի մեքենայով Վարդան և Դավիթ Սարգսյաններն ու Գևորգ Աբրահամյանը հետևել են զորամասի մեքենային, նրա հետևից գնացել են ոստիկանության զորքերի վարչության շենքի մոտ, որտեղ գտնվում էր նաև հանցավոր խմբի «Մոսկվիչը»:
Ժամը 13-ն անց 30-ին հաշվապահ Լյուդմիլան, գանձապահ Ռուզաննան, զորամասի սպա Կարենը և ենթասպա Ալեքսանդրը զորամասի աշխատողների աշխատավարձի գումարը՝ 93 միլիոն 720 հազար դրամը հաշվապահությունից ստացել ու մեքենայով Ծարավ Աղբյուրի փողոցով ուղևորվել են դեպի զորամաս:
Նախապես կազմած ծրագրի համաձայն՝ հանցավոր խմբի անդամներից Գևորգ Աբրահամյանը իր վարած «Մոսկվիչը» դուրս է բերել հանդիպակաց երթևեկելի ուղեմաս, բախվել աշխատավարձ տեղափոխող մեքենայի ձախ կողմին ու կանգնել քիչ հեռու:
Ալեքսանդրը նույնպես կանգնեցրել է «ԳԱԶ-2410»-ը՝ չկասկածելով, որ կեղծ վթար էր տեղի ունեցել: Ավելին, մեքենայում գտնվող տղամարդիկ իջել են հսկայական գումար տեղափոխող անպաշտպան մեքենայից:
Գևորգ Աբրահամյանը նախապես շշերի մեջ լցրած բենզինի միջոցով հրկիզել է «Մոսկվիչը»՝ ցանկանալով գրավել «ԳԱԶ-2410»-ի ուղևորների ուշադրությունը:
Նրանց վախեցնելու նպատակով աղաղակել է, թե մեքենայում գտնվող գազի բալոնը ուր որ է՝ կպայթի, և ինքը ոտքով դիմել է փախուստի: Փախչելու ժամանակ ճանապարհին նա ձեռքից գցել է դիմակի վերածած գլխարկը:
Այդ նույն ժամանակ Հովագիմյանը իր «ՎԱԶ-2107»-ով մոտեցել է «ԳԱԶ-2410»-ին, մեքենայից իջել են Վարդան և Դավիթ Սարգսյանները, իրենց մոտ եղած ատրճանակներն ուղղել են գումար տեղափոխողների վրա:
Վերջիններս իրենց կյանքին ուղղված վտանգը ընկալել են որպես իրական:
Սարգսյանները պահանջել են մեքենայի սրահում գտնվող գումարով լի պայուսակը:
Ալեքսանդրն իրեն ամրակցված ինքնաձիգն ուղղել է հանցագործների վրա, բայց Հովագիմյանը իր վարած «ՎԱԶ-2107»-ով նրան վրաերթի է ենթարկել ու մեքենայով դիմել է փախուստի:
Ալեքսանդրը վրաերթի հետևանքով վայր է ընկել, նրա առողջությանը պատճառվել է թեթև վնաս:
Սարգսյան եղբայրները, հանդիպելով գումարը տեղափոխողների՝ հատկապես կանանց դիմադրությանը, ինչպես նաև տեսնելով, որ Հովագիմյանը փախուստի դիմեց, իրենք ևս ձեռնունայն դիմել են փախուստի:
Ճանապարհին Դավիթ Սարգսյանն իր մոտ եղած գազային ատրճանակը նետել է թփերի մեջ:
Ընդհանուր իրավասության դատարանը խմբի անդամներին մեղավոր է ճանաչել ավազակային հարձակում կատարելու համար:
Վարդան և Դավիթ Սարգսյանները, Ռադիկ Հովագիմյանը և Գևորգ Աբրահամյանը դատապարտվել են 10-ական տարի, իսկ Գևորգ Հովակիմյանը՝ 9 տարի ազատազրկման:
