1790-ի հուլիսի 16-ին ԱՄՆ Կոնգրեսը որոշում է ընդունել Պոտոմակ գետի վրա 26 ք/կմ մակերեսով քաղաք հիմնել: Տարածքն ընտրել է առաջին նախագահ Ջորջ Վաշինգտոնը: Նոր քաղաքի տարածքն, ի պատիվ Քրիստափոր Կոլումբոսի, անվանել են Կոլումբիա շրջան, իսկ քաղաքը, ի պատիվ ԱՄՆ առաջին նախագահի, Վաշինգտոն:
Նոր քաղաքի պլանի մշակմամբ զբաղվել է ռազմական ինժեներ և անկախության համար մղված պատերազմի մասնակից Պիեռ Լանֆանը, ըստ որի՝ քաղաքը պետք է փողոցների ուղղանկյուն ցանց լիներ, որը կհամալրվեր անկյունագիծ պողոտաներով:
1800 թվականի դեկտեմբերի 1-ին Վաշինգտոնը հռչակվել է ԱՄՆ-ի մայրաքաղաք: Այդ ժամանակից ի վեր այն հաճախ է վերակառուցվել:
Վաշինգտոնում են տեղակայված ԱՄՆ նախագահի նստավայրը՝ Սպիտակ տունը, Կոնգրեսի շենքը, Գերագույն դատարանը և այլ դաշնային հաստատություններ, ինչպես նաև՝ խոշորագույն կորպորացիաների, բանկերի, շտաբ-գրասենյակների և այլ կազմակերպությունների շենքեր: Այնտեղ են գտնվում Գիտությունների ազգային ակադեմիան, Բուսաբանական այգին, 5 համալսարան, ավելի քան 100 թանգարան, հայտնում է calend.ru-ն:
