«Ես գիտեի, որ նման բան ի վերջո պետք է տեղի ունենա։ Այս իշխանությունները 2008 թվականից հետո ծրագրավորված արտագաղթ էին կազմակերպում, որ բողոքող մասսան հեռանա Հայաստանից, բայց ես նաև ասել եմ, որ ինչքան էլ մարդիկ հեռանան Հայաստանից, բավարար մասսա մնալու է, որը հանդես կգա հանուն իր արժանապատվության պայքարին՝ ընդդեմ գործող իշխանությունների»,- Առաջին լրատվական»-ի հետ զրույցում ասաց իրավապաշտպան Վարդան Հարությունյանը՝ անդրադառնալով Սերժ Սարգսյանի հրաժարականին։
Իրավապաշտպանն ընդգծեց, որ բոլորովին չէր պատկերացնում, որ այսքան զանգված դուրս կգար հրապարակ, որի համար միայն պետք է ծափահարել կազմակերպիչներին՝ Նիկոլ Փաշինյանին և խոնարհվել երիտասարդների առաջ։
Մեր հարցին, թե ամեն դեպքում ի՞նչը հետ պահեց Սերժ Սարգսյանին չգնալ ուժային լուծումների, իրավապաշտպանը պատասխանեց. «Այս իշխանությունները միշտ էլ մեկ տարբերակ են ունեցել։ Նրանք իրենց տասնամյա և ավելի գործողություններով ապացուցել են, որ ընդունակ են միայն ուժային լուծումների։ Հասարակությունը պետք է միշտ ճնշման ներքո լինի, իսկ իրենք կալվածատիրոջ իրավունքով ղեկավարեն, բայց մի կարևոր հանգամանք նրանք հաշվի չեն առել, որ Մարտի 1-ը սպառել էր Մարտի 1-ը։ Մարտի 1-ից հետո երկրորդ Մարտի 1 իրականացնել չէին կարող։ Երբ այսքան զանգված դուրս եկավ փողոց, այսքան երիտասարդ, ուսանող ոտքի կանգնեց, նրանք կորցրեցին իրականության զգացողությունը, որովհետև սա արդեն նրանց ծրագրերից դուրս էր։ Դրանից հետո արդեն սպառվել էր նրանց կրակելու հնարավորությունը, Մարտի 1-ին բոլոր փամփուշտները կրակվել էին։ Նա հեռացավ, ոչ թե նրա համար, որ նա մարդասեր էր, այլ այն պատճառով, որ այլևս կրակել չէր կարող։ Դրա մասին մի քանի օր անընդմեջ նրան ասվում էր հարթակից»,- նշեց իրավապաշտպանը։
Վարդան Հարությունյանը նշեց, որ տեղի ունեցած գործընթացները ՀՀ տնտեսության վրա ազդելու են, բայց միայն դրականորեն։ Որևէ այն մաքսիմում բացասականը, որը եղել է Հայաստանում, երեկվանից արդեն ավարտվել է։ «Ավելի վատ լինել չի կարող։ Երբ որ կջարդվի օլիգարխիկ համակարգը, երբ որ քաղաքականությունը և տնտեսությունը կբաժանվեն իրարից, երբ որ պետական չինովնիկները մասնակցություն չեն ունենա բիզնեսի մեջ, տնտեսությունը դրանից միայն կաճի»,- ասաց Հարությունյանը։
Առավել մանրամասն՝ տեսանյութում։
