Օրերս կապիկների ուսումնասիրության Հարավարևմտյան կենտրոնում, որը գտնվում է ԱՄՆ Տեխաս նահանգի Սան Անտոնիո քաղաքում, մի քանի պավիանի հաջողվել է փախչել՝ կերով լի տակառի օգնությամբ։ Սակայն կենտրոնի աշխատակիցները գտել են փախստականներին և վանդակ վերադարձրել։
Արտասովոր դեպքը տեղի է ունեցել անցյալ շաբաթ։ Մյուս կենդանիների հետ մեծ վանդակում գտնվող պավիանների խումբը փախչելու համար օգտագործել է 208 լիտրանոց կերով լի տակառը։ Վանդակում գտնվող տակառների վրա անցքեր են բացվել, որպեսզի կենդնաիները կարողանան ինքնուրույն վերցնել կերը։
Կապիկներն ինչ-որ կերպ տակառը ուղղահայց ձևով են տեղադրել, իսկ հետո դրա օգնությամբ փախել վանդակից։
Որոշ ժամանակ անց կենտրոնի աշխատակիցները գտել են կապիկներին։ Նշվում է, որ ո՛չ մարդիկ, ո՛չ կենդանիները չեն տուժել։
