«Կցանկանայի, որ կառավարության կազմը փոխվեր․ որոշ նախարարների վերանշանակման առումով ես բացարձակապես կողմ չեմ և ես գտնում եմ, որ օրինակ էկոնոմիկայի նախարարը (այժմ Տնտեսական զարգացման և ներդրումների նախարարություն) պետք է անպայման փոխվեր․ Սուրեն Կարայանը թող չվիրավորվի, բայց կարծում եմ, որ էկոնոմիկայի նախարարությունում ավելի ուժեղ հատկանիշներով, ավելի բազմակողմանի գործելակերպով և լիդերական հատկանիշներով նախարար էր հարկավոր, որովհետև դա առանցքային նախարարություն է և այդ նախարարության գործելաոճի մասին տարբեր դժգոհություններ կան, այսինքն ենթադրում էի, որ գոնե էկոնոմիկայի նախարարի պաշտոնը պետք է ստանձներ այլ անձ։
Երկրորդ՝ գտնում եմ, որ պետք է, անպայման, փոխվեր Կրթության և գիտության նախարարը․ ես երբեք չեմ ողջունել այն միտքը, որ Լևոն Մկրտչյանը պետք է նորից նշանակվի ԿԳ նախարար, որովհետև կրթական համակարգում մենք ունենք հստակ խնդիրներ և կրթությունը մեր տնտեսության շարժիչ ուժերից է՝ մրցունակ աշխատատեղեր ստեղծելու և ներդրումներ գրավելու տեսանկյունից, իսկ այս նախարարությունն այս գործառույթներն առանձնապես չի կարողանում կատարել և շատ հաշտվողական կեցվածք ունի։
Բացի սրանցից, կարծում եմ, որ 2-3 նախարարներ ևս պետք է կամ իրենց աշխատանքն օպտիմալացնեն կամ նրանց պետք է փոխել»,- «Առաջին լրատվական»-ի հետ զրույցում ընդգծեց Գործատուների հանրապետական միության նախագահ Գագիկ Մակարյանը՝ անդրադառնալով ձևավորվելիք կառավարության կազմին։
Հիշեցնենք, որ ապրիլի 17-ին ԱԺ-ում պատգամավորների բաց քվեարկությամբ Սերժ Սարգսյանը 77 կողմ ձայնով ընտրվեց ՀՀ վարչապետ․ այս օրերին ընթանում է նոր կառավարության ձևավորման գործընթացը և մի քանի նախարարներ արդեն իսկ վերընտրվել են իրենց պաշտոններին, իսկ վարչապետի առաջին տեղակալ է նշանակվել այլևս նախկին վարչապետ Կարեն Կարապետյանը, մյուս երկու փոխվարչապետներն են՝ Վաչե Գաբրիելյանը և Արմեն Գևորգյանը։
Նշենք նաև, որ այս օրերին Երևանում և ՀՀ մի շարք մարզերում «Իմ քայլը» նախաձեռնության շրջանակներում տեղի են ունենում ամենօրյա հանրահավաքներ ու քայլերթեր։
Մանրամասները՝ տեսանյութում։
