Հյուսիսային պողոտայի նախկին բնակիչները շարունակում են պայքարել: Այսօր նրանք նորից կառավարության շենքի մոտ էին:
«Սեփականության իրավունքի պաշտպանություն» ՀԿ-ի նախագահ Վաչագան Հակոբյանը «Առաջին լրատվական»-ի հետ զրույցում նշեց, որ արդեն տասներորդ տարին է լրանում, որ պայքարում են վերականգնելու իրենց սեփականությաւն իրավունքը: Եվ ամեն անգամ խաբում են, թե կվերանայեն:
«2007-ին հանդիպեցինք Սերժ Սարգսայնի հետ: Այն ժամանակ նա հրապարակայնորեն խոստացավ, որ մեկ ամսվա ընթացքում մեր հարցերը կլուծի: Խաբեց,: Դարձավ նախագահ և իր խոստումները չկատարեց»,- ասաց Վաչագան Հակոբյանը:
Նա նշեց, որ Ռոբերտ Քոչարյանը և Երվանդ Զախարյանը թալանեցին ժողովրդին՝ ծեծելով, ջարդելով, զրկեցին սեփականությունից: «Ութ մահ ունեցանք հանելու ժամանակ: Յոթ հոգի էլ վերջերս մահացան»,- ասաց նա:
Սերժ Սարգսյանը 2007-ին հանդիպելով բնակիչներին՝ խոստացել է 35 հոգու բնակարանի հարցը լուծել, բայց, ինչպես իրենք են ասում, խաբեց, մոռացավ:
Վաչագան Հակոբյանի խոսքով՝ այնքան նամակ են գրել այս տասը տարիների ընթացքում… Նախ նամակ են գրել այն ժամանակ քաղաքապետ Գագիկ Բեգլարյանին, որ գողացել են իրենց բնակարանները, և թող պատասխանատվության ենթարկեն նրանց, ոչ թե պաշտոն տան:
Բնակիչներից շատերն են լքել երկիրը, սակայն Վաչագան Հակոբյանի խոսքով՝ եթե հարցը լուծում ստանա, կվերադառնան:
«Թուրքը պետք է գա վաղը այստեղ, դրոշակ կախի, թող խելքները գլուխները հավաքեն: Մենք պայքարելու ենք, միացել ենք ազատամարտիկներին: Մենք մեր հարցերը կլուծենք, որ թողնեն գնան, մենք համակարգափոխություն ենք ուզում»,- հավելեց նա:
