Հատուկ քննչական ծառայությունը երեկ հաղորդագրությամբ տեղեկացրել է, որ ԱԺ նախկին պատգամավոր, ՀՀԿ-ական Խաչիկ Մանուկյանին պատկանող «Մաքս Կոնցեռն» ընկերությունում ընկերության նախկին աշխատակիցներին ապօրինաբար պահելու փաստի առիթով քրեական գործ է հարուցվել քր.օր.-ի 133-րդ հոդվածի 2-րդ մասի 1-ին և 6-րդ կետերով: Ըստ ՀՔԾ-ի` նախաքննությամբ պարզվել է, որ Խաչիկ Մանուկյանի օգնականը՝ Վասպուրակ Մարտիրոսյանը, մի խումբ անձանց հետ ընկերության նախկին աշխատակիցներին 6 օր շարունակ պահել են ընկերության շենքում մինչև վերջիններս պարտադրմամբ և թելադրանքով գրել են «Լուսակերտի տոհմային թռչնաբուծական ֆաբրիկա» ՍՊԸ-ի դրամարկղ գումարներ վճարելու վերաբերյալ պարտավորագրեր:
Խաչիկ Մանուկյանը երեկ «Առաջին լրատվական»-ի հետ զրույցում ասաց, որ այս պատմությունը շատ հին է: ՀՔԾ-ում ներկայումս բողոք ներկայացրած անձինք նույն գործի շրջանակներում մեկ անգամ դատապարտվել են, ապա դուրս գալով բանտից, ինչ-որ մեկի դրդմամբ որոշել են բողոք ներկայացնել իր ընկերության դեմ: Ըստ Խաչիկ Մանուկյանի` եղելությունն այն է, որ իրենց ընկերության հետ աշխատող մատակարար Արամ Պետրոսյանը ժամանակի ընթացքում իր շուրջը հավաքելով ընկերության մյուս աշխատողներին՝ պահեստապետին, կշեռքավարին, տեխնոլոգին, տնօրենի տեղակալին, որակի տեսուչին, հանցավոր խումբ է ստեղծել և սկսել յուրացնել ընկերության փողերը:
«Նա անորակ ապրանք է բերել, փոխարենը գրվել է, որ այդ ապրանքը բարձր որակի է, և դիմացը ավել փող է վերցրել ու բաժանել իրենց մեջ: Այնուհետ ամեն անգամ այդպես պակաս կամ անորակ ապրանք է բերել, գրվել է ավել և որակով, և փողը բաժանել են իրենց մեջ: Իսկ ավելի ուշ սկսել են նույնիսկ ապրանք չբերել, գարու, ցորենի փոխարեն ավազ են բերել, իսկ խումբը որոշել է, որ ավազը լավ որակի ապրանք է և ընդունել է՝ դիմացը դուրս գրելով լավ ապրանքի համար անհրաժեշտ գումարը»,- պատմեց Մանուկյանը՝ ավելացնելով, որ այդ վիճակը տևել է ավելի քան 3 տարի, որի արդյունքում ինքը կրել է ավելի քան 1 միլիարդ դրամի վնաս: Բայց երբ ինքը նկատել է, որ 100-200 հազար դրամ աշխատավարձ ստացող իր աշխատակիցները սկսել են խանութներ, ռեստորաններ գնել, Lexus մակնիշի մեքենա վարել, հետևել և պարզել է, թե որտեղից են իր աշխատակիցները դիզում այդ եկամուտները: Իր բացահայտումներից հետո 2009-ին դիմել է ոստիկանություն, գործ է հարուցվել, և մեղավորները պատժվում են:
«Անցավ 3 տարի, նոր սրանք հիշեցին, որ կարան ստեղ ինչ-որ բան անեն, փող աշխատեն, չգիտեմ, ինչ-որ փաստաբան են գտել, որն ուղղորդում է սրանց: Մի անգամ դիմել են ՀՔԾ, բայց ՀՔԾ-ն ամռանը կարճեց գործը, բայց իրենք բողոքեցին նախագահական, նորից դիմեցին դատարան, որից հետո նոր գործը կրկին վերաբացվեց»:
Մանուկյանն անդրադառնալով աշխատակիցներին իր ընկերությունում ապօրինաբար պահելուն և նրանց պարտավորագիր ստորագրել տալուն, ասաց, որ դա չափազանցված որակում է իրենց արածին: Ինքն ընդամենը իր միջոցները յուրացրած անձանց հրավիրել է ընկերություն, նստեցրել և պահանջել է, որ մանրամասն գրեն, թե երբ և ինչքան են յուրացրել: «Ասել եմ, նստեք գրեք, թե երբ ու ոնց: Դա եղավ, որ ես իրենց փակի տա՞կ եմ պահել: Իրենք գնացել եկել են, օֆիսում պահակների հետ խորոված ու քաբաբ են կերել: Դա եղավ փակի տակ պահե՞լ»,-զարմացավ Մանուկյանը՝ ավելացնելով. «Բայց ես սրանց բոլորին պատժելու եմ: Այն ժամանակ իրենց ծնողները եկան խնդրեցին, որ շատ չբողոքեմ, բայց հիմա նորից գործ եմ հարուցելու, ու սրանք բոլորը գնալու են պատասխան տան»:
