Ուկրաինայի նախագահ Վիկտոր Յանուկովիչը երկրի կենտրոնական հեռուստաալիքներին տված հարցազրույցում հայտարարել է, որ ԵՄ-ի հետ Ասոցացման համաձայնագիրը կստորագրվի, երբ Կիևն ու Բրյուսելը պայմանավորվեն «նորմալ» պայմանների շուրջ: Նախագահը հասկացնել է տվել, որ ԱՄՀ-ի ներկայիս պահանջները Կիևը չի կատարի: Այս մասին փոխանցում է Russia Today-ը:
Յանուկովիչը հայտնել է, որ համաձայնագրի ստորագրման դեպքում դեռևս 2010 թվականին երկրին 640 մլն եվրոյի օգնություն է խոստացվել:
«Մեզ դա որպես կոնֆետ են ցուցադրել, ասել՝ կստանաք, երբ ստորագրեք համաձայնագիրը: Սակայն պետք չէ մեզ նվաստացնել, մենք լուրջ երկիր ենք, եվրոպական: ԱՄՀ-ն ասում է՝ բարձրացրեք սակագները, սառեցրեք աշխատավարձերն ու կենսաթոշակները և այլն: Իսկ ես չեմ կարող դրան գնալ: Մենք կանենք ամեն ինչ, որպեսզի երկիրը լինի հզոր, մրցունակ»,- հայտարարել է Յանուկովիչը:
Ուկրաինայի շատ քաղաքներում արդեն մոտ մեկ շաբաթ շարունակվում են բողոքի ցույցերն ընդդեմ ԵՄ-ի հետ Ուկրաինայի Ասոցացման համաձայնագրի ստորագրման նախապատրաստությունների դադարեցման: Եվրաինտեգրման կողմնակիցները կարծում են, որ իշխանությունները ցանկանում են զրկել իրենց արժանապատիվ ապագայից:
Հազարավոր իրավապահներ պահպանում են կարգուկանոնը Ուկրաինայի Գերագույն ռադայի, կառավարության տան ու նախագահի նստավայրի մոտ:
Ցուցարարների հիմնած վրանային ավանները վկայում են այն մասին, որ նրանք, չնայած 0-ից ցածր ջերմաստիճանին, չեն պատրաստվում հեռանալ մինչև ուրբաթ, քանի դեռ Վիլնյուսում չի ավարտվել «Արևելյան գործընկերության» գագաթնաժողովը: Նրանք դեռ հույս ունեն, որ Ուկրաինան վերջին պահին կստորագրի ԵՄ-ի հետ Ասոցացման համաձայնագիրը՝ չնայած իշխանությունների հայտարարությանը, թե այդ փաստաթուղթը չեն ընդունի:
Ներկայում հազարավոր մարդիկ շրջապատել են կառավարության շենքը: Իշխանությունները հայտարարել են սադրանքների հրահրման անթույլատրելիության մասին:
