«2Ն Քոմփընի» ընկերությունը հանդես է եկել հերթական հայտարարությամբ՝ ահազանգելով, որ Ռուսաստանի հայերի միության նախագահ Արա Աբրահամյանը ԱՄՆ-ում ունեցած իր «մութ գործերը» քողարկում է Վլադիմիր Պուտինի անունով։
Ընկերության պաշտոնական ներկայացուցիչ Յուրի Սեմյոնովը նշում է՝ իրենք վերջերս տեղեկություն են ստացել, որ «Արա Աբրահամյանն ընդդեմ իր գործընկերների» գործը Լոս Անջելեսում նախնական եզրակացություն է ստացել. «Երդվյալ ատենակալները վճիռ են կայացրել, ըստ որի՝ Արա Աբրահամյանի գործողությունները որակվել են անբարեխիղճ. դա ամենակարևոր եզրակացությունն է: Ստացվում է, որ Արա Աբրահամյանը ստախոս է»։
Յուրի Սեմյոնովը նշում է՝ Ռուսաստանում Արա Աբրահամյանը իրեն ներկայացնում է որպես պետության առաջին դեմքերի մտերիմ ընկեր, իսկ ԱՄՆ-ում պարզ խաբեությամբ է զբաղված: «Այս պարագայում ի՞նչ իմիջ է ստանալու Ռուսաստանը՝ պարզ է, որ վատ»,- ընդգծում է մեր զրուցակիցը։
«Մենք ուզում ենք մեր ամերիկացի գործընկերներին զգուշացնել, որ Արա Աբրահամյանը նրանց նկատմամբ կարող է իրականացնել այն նույն գործողությունները, ինչ անում է մեր նկատմամբ, նա կարող է անցնել ցանկացած բանի վրայով։ Ուզում եմ ասել, որ Արա Աբրահամյանը պարտվելով դատական բոլոր առյանները՝ կռիվ է սկսում արդեն անօրինական դաշտում։ Օգտագործելով կոռուպցիոն մեխանիզմները՝ հարուցել է քրեական գործ ու իր բիզնես գործընկերների նկատմամբ ռեյդային հարձակումներ է անում այն մարդկանց նկատմամբ, որոնցից սնվել է տարիներ շարունակ»,- «Առաջին լրատվական»-ի հետ զրույցում ասաց Սեմյոնովը։
Յուրի Սեմյոնովը տեղեկացնում է նաև, որ Արա Աբրահամյանի անձի շուրջ նոր, շատ կարևոր մանրամասներ են ի հայտ գալու, որոնց մասին իրենք առաջիկայում կբարձրաձայնեն. «Ինֆորմացիան կա, բայց դրանք դեռ պետք է ստուգվեն, չեմ ուզում չստուգված ինֆորմացիա հրապարակել»։
Սեմյոնովը հավելում է. «Բոլոր իր մութ գործերը նա քողարկում է հասարակ PR-ով՝ իբրև թե ինքը Վլադիմիր Պուտինի ու նրա մերձավոր շրջապատի հետ շատ լավ հարաբերություններ ունի։ Բայց իրականում նա զբաղված է անօրինական գործողություններով. հիմա նա կոնկրետ Ռուբեն Գրիգորյանի նկատմամբ ռեյդային հարձակմամբ է զբաղված։ Կա նաև Միացյալ Նահանգների օրինակը։ Մի շարք մարդիկ գալիս են մեզ մոտ դժգոհում, պատմում, թե իրենց նկատմամբ ինչ անօրինական գործողություններ է իրականացրել Արա Աբրահամյանը, մենք այդ բոլորն անպայման ստուգում ենք և ստուգելուց հետո կհրապարակենք»։