Ճապոնական ավիաընկերությունները որոշում են կայացրել չճանաչել ՀՕՊ նույնականացման գոտին, որը սահմանել են Չինաստանի իշխանությունները Արևելաչինական ծովի ջրերի մեծ մասի վրա՝ հաղորդում է Agence France-Presse-ը:
Ավելի վաղ Ճապոնիայի կառավարությունը այս երկրի ավիաընկերություններին կոչ էր արել ընդունել նման որոշում, սակայն ճապոնական ավիափոխադրողները, այդ թվում՝ JAL և All Nippon խոշորագույն ավիաընկերությունները, սկզբում հայտարարել էին Չինաստանի պահանջներին ենթարկվելու որոշման մասին: Սակայն երեքշաբթի ճապոնական ավիափոխադրողների ժողովի ժամանակ որոշում է կայացվել չճանաչել Չինաստանի ՀՕՊ նոր գոտին:
Չորեքշաբթի օրվանից՝ տեղի ժամանակով ժամը 00.00-ից սկսած, JAL-ը և All Nippon-ը դադարել են կատարել պահանջները, որոնք սահմանել է Չինաստանի ՀՕՊ գոտին, այն է՝ ցույց տալ թռիչքի ծրագիրը և զեկուցել օդանավի ազգային պատկանելության մասին:
Չինաստանը հակաօդային պաշտպանության նոր գոտու ստեղծման մասին հայտարարել է նոյեմբերի 23-ին: Այն մասամբ ծածկում Սենկակու վիճելի կղզիների օդային տարածությունը, որոնք փաստացիորեն վերահսկում է Ճապոնիան: Նոր գոտին մասամբ հատվում է նաև Հարավային Կորեայի ՀՕՊ վերահսկողության տակ գտնվող օդային գոտու հետ: Ե՛վ Ճապոնիան, և՛ Հարավային Կորեան իրենց դժգոհությունն են արտահայտել Չինաստանի նման գործողությունների կապակցությամբ:
