ՌԴ-ն երկու նպատակ ունի՝ չլուծել ԼՂ հակամարտությունը և ԼՂ-ում տեղակայել ռուսական զորքեր՝ խաղաղապահի անվան ներքո: Այսօր լրագրողների հետ հանդիպմանը այս մասին ասաց «Համաձայնություն» կենտրոնի ղեկավար Դավիթ Շահնազարյանը՝ պատասխանելով լրագրողների հարցին, թե ինչու սեպտեմբերի 3-ից հետո ՀՀ-ում քաղաքացիական դիմադրություն չսկսվեց՝ ինչպես Ուկրաինայում: Նա կարծիք հայտնեց, որ մոտ ապագայում կբարձրանա մեծ բողոքի ալիք:
«Հիմա ՀՀ-ում կան դիմադրության առանձին օջախներ, որոնք ժամանակի ընթացքում ինքնուրույն կկազմավորվեն: Առայժմ ՌԴ-ի կողմից վերահսկվող ուժերը կարողանում են քողարկել այդ ամենը»,- պարզաբանեց Դավիթ Շահնազարյանը:
Անդրադառնալով ՀՀ անվտանգության հարցերին՝ նա ասաց, որ ՀՀ արտաքին քաղաքականությունը, անվտանգությունն արդեն ամբողջովին տնօրինում է ՌԴ-ն: Ավելին, նրա համոզմամբ՝ իր շահեը հետապնդելով, ՌԴ-ն ԼՂ հակամարտությունը չի լուծի այնպես, ինչպես մենք կցանկանայինք: «Համաձայնություն» կենտրոնի ղեկավարը հիշեցրեց նաև 1988թ.-ի շարժումը, որը, նրա համոզմամբ, սկսվեց հենց այդ պատճառով: Դավիթ Շահնազարյանը նշեց, որ այդ շարժմամբ Հայաստանը ԼՂ-ն ազատագրեց առաջինը ռուսական կայսրությունից, այնուհետև նոր՝ Ադրբեջանից:
«Դա ճնշվում էր ռուսական բանակի ու տանկերի միջոցով Երևանի կենտրոնում: Մենք մեր ձեռքերով դիմակայում էինք այդ տանկերին: Հիշեցնեմ, որ Հյուսիսային Արցախն օկուպացվեց ռուսական զորքերի կողմից, այդ «Կոլցո» օպերացիայով սկսվեց պատերազմը: 1992թ. ամռանը՝ Շուշիի և Լաչինի գործողություններից հետո, ԼՂ տարածքի 52 տոկոսն անցավ Ադրբեջանի վերահսկողության տակ, իսկ այդ օպերացիան կատարել էր ՌԴ 23-րդ դիվիզիան: Հիմա վերադառնում ենք նույն վիճակին:
Մենք 200 տարի տեսել ենք, թե ինչպես է ռուսական կայսրությունն ապահովել մեր անվտանգությունը»,- նշեց Դավիթ Շահնազարյանը՝ հավելելով, որ ՌԴ-ն երկու նպատակ ունի՝ չլուծել ԼՂ հակամարտությունը և ԼՂ-ում տեղակայել ռուսական զորքեր՝ խաղաղապահի անվան ներքո:
Ինչ վերաբերում է ՌԴ նախագահ Վլադիմիր Պուտինի՝ ՀՀ կատարելիք այցին, ապա, ըստ Դավիթ Շահնազարյանի, նա պատրաստվում է այցելել ռուսական ռազմաբազա և նրա շրջակա միջավայրը:
«Եթե դա աշխատանքային այց է, կոչ եմ անում ՀՀ իշխանություններին, որպեսզի Պուտինին ՀՀ-ում դիմավորի Արմեն Գևորգյանը, ինչպես Ադրբեջանում նրան դիմավորեցին: Գոնե այդ հարցում փորձեն պահպանել մեր պետության արժանապատվությունը, ոչ թե վազեն Գյումրի»,- նշեց Դավիթ Շահնազարյանը:
Անդրադառնալով ԵՄ ԱլԳ ծրագրին և այդ ծրագրի բացթողումներին՝ նա ասաց, որ Բրյուսելը չհասկացավ մի պարզ բան, այն է՝ անհնար է առաջ տանել հարևանության քաղաքականությունը և փորձել նախաստորագրել այդ երկրների հետ ԱՀ՝ միաժամանակ պահպանելով լավ հարաբերություններ ՌԴ-ի հետ:
«Եթե ապագայում ի հայտ չգա լուրջ աշխարհաքաղաքական գործոն, ապա ՌԴ քաղաքականությունը վտանգ է նաև համաեվրոպական անվտանգության համար: Երրորդ սխալը համարելով այն, որ Սերժ Սարգսյանը ներսում որևէ քայլ չի իրականացրել բարեփոխումների ուղղությամբ, բայց արտաքին քաղաքականությունը ճիշտ է վարել, գտնում եմ, որ ԵՄ-ն ճիշտ չէր, երբ աչք էր փակում այն ամենի վրա, ինչ ներսում էր տեղի ունենում:
«Այդ քաղաքականությանը պետք է վերջ տալ ամբողջովին և համարժեք գնահատականներ տալ, թե ինչ է կատարվում ՀՀ-ում մարդու իրավուքների, ազատությունների ոլորտներում, և դադարեցնեն որևէ ֆինանսական օգնություն այդ իշխանություններին, որովհետև դրանով ամրապնդում են օտարին ծառայող իշխանություններին: Եվրոպան պատրաստ էր օժանդակություն ցույց տալ թե Ուկրաինային, թե ՀՀ-ին, բայց քայլերի դիմաց:
Եթե Հայաստանը նախաստորագրեր ԱՀ-ն, առաջիկա երեքուկես-չորս տարում ԵՄ-ն պատրաստ էր ՀՀ-ին մինչև 6 մլրդ եվրոյի օժանդակություն ցուցաբերել, բայց՝ քայլերի դիմաց, ոչ թե գրպանի փող: Ուկրաինայի դեպքում՝ շատ ավելի մեծ գումար, այսինքն՝ ստորագրելուց հետո ամեն քայլի դիմաց՝ օգնություն, բայց ՌԴ-ն վարում է ճնշման և շանտաժի քաղաքականություն»,- նման տեսակետ հայտնեց Դավիթ Շահնազարյանը:
