«Ես չեմ կարող ասել, թե Նիկոլ Փաշինյանի քայլերթը ինչ օգուտ կտա, բայց ես այսօր հայկական քաղաքական իրականության համար բավական ստանդարտ վիճակ եմ տեսնում, երբ ընդդիմությունը ոչ թե պայքարում է իշխող կուսակցության դեմ, այլ մեկ ընդդիմությունը պայքարում է մյուս ընդդիմության դեմ»,- «Առաջին լրատվական»-ի հետ զրույցում ասաց Gallup International Association-ի հայաստանյան ներկայացուցչության տնօրեն Արամ Նավասարդյանը՝ հավելելով, որ չի կարծում, թե այս անգամ էլ նախորդ մյուս պայքարներից տարբերվող արդյունք կունենանք։
«Երբ որ ես նայում եմ իրար նկատմամբ փոխադարձ այդ վիրավորանքները, քննադատությունը, ինձ մոտ դեժավյու է։ Ժամանակին էլ կային եռյակ, քառյակ, հնգյակ, հետո դրանք տրոհվեցին, ունեցան վատ ավարտ, և ոչ թե նրա համար, որ վատ ծրագիր էին ներկայացրել, այլ այն պատճառով, որ իրար հետ լեզու չգտան»,- նկատեց Նավասարդյանը։
Նա նշեց, որ իր համար առնվազն անհասկանալի է, թե ինչու են ընդդիմությունը, ընդդիմադիր ուժերը իրենց պայքարը սկսում քաղաքական լուրջ պրոցեսներից մեկ կամ մեկուկես ամիս առաջ, երբ գրեթե ժամանակ չի մնում գործելու։ «Եթե ունեն այդպիսի էֆեկտիվ ճանապարհ, որը կբերի արդյունքի, լավ է, բայց հիմա շատ քիչ ժամանակ է մնացել, և թե այս կարճ ժամանակում ինչ արդյունք կլինի, մենք կտեսնենք հաշված օրերի ընթացքում»,- ասաց Նավասարդյանը՝ հավելելով, որ շատ հնացած է լոզունգներով քաղաքական պայքարի գնալը՝ մանավանդ, երբ այդ լոզունգների համար բացատրություն չկա, անձի դեմ պայքարելով՝ այլընտրանքային թեկնածու չի առաջադրվում։
«Եթե դու չես ասում, թե ով է քո լիդերը, ով է քո վարչապետի թեկնածուն, երկիրը փորձադաշտ չի։ Եթե ընդդիմադիր քաղաքական ուժերը լուրջ էին վերաբերվում այդ գործընթացին, նրանք առնվազն մեկ տարի առաջ պետք է հրապարակեին, թե ում են տեսնում իրենք վարչապետի պաշտոնում, առաջարկեին նախարարների իրենց թեկնածուներին։ Այդ թեկնածուների անունները բարձրաձայնվեին, և տեսնեին, թե ինչ արձագանք կա հասարակության մոտ նրանց վերաբերյալ»։
Արամ Նավասարդյանը ասաց, որ Սերժ Սարգսյանի վարչապետությունը կանխելու մասով այս պայքարը արհեստածին է։ Ընդդիմադիր քաղաքական ուժերը պայքարում են կոնկրետ անձի դեմ, բայց մեկ անձի փոփոխությամբ բան չի փոխվում։ Երկրում առկա վիճակը համակարգի հետևանքով է, պայքարն էլ, հետևաբար, պետք է լինի համակարգի դեմ, այլ ոչ թե Սերժ Սարգսյանի։
Առավել մանրամասն՝ տեսանյութում:
