Հյուսիսային պողոտայում Burger King արագ սննդի ցանցի կենտրոններից մեկում տեղի ունեցած պայթյունից, նախնական տվյալներով, տուժել է 9 մարդ, այդ թվում օտարերկրյա քաղաքացիներ, ովքեր տեղափոխվել են «Սուրբ Գրիգոր Լուսավորիչ» ԲԿ։ Բարեբախտաբար, զոհեր չկան: Նախնական տվյալներով խոհանոցում պայթել է թթվածնի բալոն։
Հատկապես Ռուսաստանի Կեմերովո քաղաքում տեղի ունեցած հրդեհից հետո հասարակությունը նման պատահարներին արձագանքում է ավելի զգայուն և էմոցիոնալ: Պատահական չէ, որ Burger King-ում տեղի ունեցած պայթյունի լուրն արագ տարածում գտավ լրատվամիջոցներում` իր վրա բևեռելով հասարակության համակ ուշադրությունը: Այս պարագայում տեղի ունեցածին լրացուցիչ ինտրիգ է հաղորդում այն հանգամանքը, որ տուժածների մեջ կան նաև օտարերկրացիներ, այդ թվում` Ռուսաստանի և Իրանի քաղաքացիներ:
Պատահական չէ, որ քիչ առաջ «Սուրբ Գրիգոր Լուսավորիչ» բժշկական կենտրոն է ժամանել ԱԺ նախագահ Արա Բաբլոյանը։ Խորհրդարանի խոսնակը բժշկական խալաթով է եղել։ Ըստ ամենայնի` պահանջարկված են եղել Բաբլոյանի մասնագիտական ունակությունները, որովհետև տուժածների մեջ կան նաև երեխաներ:
Անշուշտ, իրադարձության տաք հետքերով չենք ուզում հեռուն գնացող ենթադրություններ անել, առաջ քաշել վարկածներ, առավել ևս` խախտել անմեղության կանխավարկածը:
Այնուամենայնիվ, ցավալին այն է, որ անգամ օտարի ողբերգությունից դասեր չենք քաղում` թողնելով, որ դժբախտությունը չոքի մեր դռանը: Եթե զոհեր չկան, դրանից միջադեպը չի դադարում վտանգավոր լինելուց, մանավանդ, որ զոհեր այս դեպքում չի եղել միայն երջանիկ պատահականության շնորհիվ:
Կեմերովոյի դեպքերից հետո Վլադիմիր Պուտինը հայտարարեց, թե պատասխանատու են պատկան մարմինները, որոնք կաշառքի, փողի դիմաց տնտեսվարողներին «վաճառում» են ցանկացած իրավունք: Burger King-ի պայթյունի դեպքում, ըստ ամենայնի, դարձյալ գործ ունենք քաղաքային իշխանությունների, պատկան մյուս մարմինների առնվազն ոչ պատշաճ վերահսկողության հետ, ինչը, անշուշտ, հետևանք է ոչ արդյունավետ և կոռումպացված կառավարման: Նման միջադեպեր, որպես կանոն, տեղի են ունենում հատկապես այն երկրներում, որտեղ իշխանությունն ու բիզնեսը սերտաճած են, ինչի հետևանքով անտեսվում են հասարակության անվտանգությունն ու շահերը: Այս դեպքում էապես տուժել են նաև մեր երկրի հեղինակությունն ու իմիջը, որովհետև միջադեպը տեղի է ունեցել մեր մայրաքաղաքի ամենաէլիտար հատվածներից մեկում, ինչի հետևանքով տուժել են նաև օտարերկրացիներ, ովքեր Հայաստանից, անշուշտ, կհեռանան տխուր տպավորություններով:
