Google որոնողական համակարգից օգտվողներն արդեն կարող են փնտրել ձայնային հրամանով: Այս մասին հայտնել են Google ընկերության ներկայացուցիչները Սան Ֆրանցիսկոյում տեղի ունեցող Inside Search կոնֆերանսի ժամանակ:
Ձայնային որոնումը կաշխատի մյուս շաբաթվանից,- հայտնում են ընկերության բլոգում: Սկզբնական շրջանում դա հասանելի կլինի միայն անգլերենով: Ձայնային ազդանշան փոխանցելու համար անհրաժեշտ կլինի սեղմել բարձրախոսի կոճակը, որը գտնվում է որոնման տողի աջ կողմում: Այս ծառայությունը հասանելի կլինի Google Chrome 11-ից բարձր տարբերակների համար:
Բջջային տարբերակի ձայնային որոնումը ընկերությունը գործարկել է դեռևս 2008 թ.: Այն գործում է մի քանի լեզուներով:
Ընկերության մեկ այլ նորամուծությունը, որը ներկայացվել է Inside Search-ի շրջանակներում, «Պատկերավոր որոնման» (Search by Image) ծրագիրն է: Որոնումն այս դեպքում իրականցվում է նկարի օգնությամբ: «Պատկերային որոնումը» թույլ կտա պարզել, թե որ նկարչի ձեռքի գործն է տվյալ նկարը, կամ ինչ վայր է պատկերված դրա վրա: Նկարը կարելի է ներբեռնել համակարգչից, կամ եթե այն կա համացանցում, տեղադրել հղման տողում:
«Պատկերավոր որոնումը» ընկերությունը կթողարկի մոտ օրերին: Ինչպես ձայնային որոնման դեպքում էր, այնպես էլ հիմա, ծառայությունը սկզբում հայտնվելու է բջջային սարքերում՝ Google Goggles հավելվածում:
