ԱՄՆ պետքարտուղար Ջոն Քերին ողջունել է Լոյա ջիրգայի՝ աֆղանական ցեղերի ավագների ժողովի որոշումն անվտանգության հարցերով երկկողմ համաձայնագրի աջակցության վերաբերյալ: Համաձայնագիրը կոչված է կարգավորել ամերիկյան ռազմական ներկայությունն այդ երկրում 2014 թվականից հետո: «Հաջորդ կենսական կարևոր քայլը պետք է լինի այդ փաստաթղթի շուտափույթ ստորագրումը»,- ասվում է ամերիկյան դիվանագիտության ղեկավարի՝ կիրակի տարածած հայտարարության մեջ՝ փոխանցում է ITAR-TASS-ը:
Նրա կարծիքով՝ համաձայնագիրը հուսալի հիմք է ստեղծում Աֆղանստանի բարեկեցության և անվտանգության ամրապնդմանն ուղղված երկու երկրների համագործակցությունը շարունակելու համար: Ամերիկյան կողմը կարծում է, որ այն պետք է ստորագրվի մինչև այս տարեվերջ, որպեսզի նրանք ժամանակ ունենան ծրագրելու աֆղանական տարածքում ամերիկյան սահմանափակ զորակազմի տեղակայումը:
Վաշինգտոնը մտադիր է այնտեղ թողնել շուրջ 10 հազար զինվոր և սպա, ովքեր կպատրաստեն աֆղան զինծառայողներին և նրանց օգնություն կցուցաբերեն ահաբեկչական խմբավորումների դեմ պայքարում:
Աֆղանստանի նախագահ Համիդ Քարզայը առայժմ հրաժարվում է ստորագրել արդեն համաձայնեցված տեքստը՝ ԱՄՆ-ից պահանջելով հանրապետության ներքին քաղաքականությանը չմիջամտելու հավելյալ երաշխիքներ:
