«Հայաստանյան իշխանությունները սիրում են արտասահմանյան գործընկերներին հայաստանյան իրավիճակը ներկայացնել շատ գեղեցիկ, վարդագույն գույներով»,- «Առաջին լրատվական»-ի հետ զրույցում ասաց Խոսքի ազատության պաշտպանության կոմիտեի նախագահ Աշոտ Մելիքյանը՝ անդրադառնալով Լյուքսեմբուրգի արտաքին գործերի և եվրոպական հարցերի նախարար Ժան Ասելբոռնի դիտարկումներին, թե Հայաստանը ճիշտ ուղու վրա է և բավականին ջանքեր է գործադրում իրավական երկիր դառնալու, մարդու իրավունքների պաշտպանության ուղղությամբ։
Մելիքյանի խոսքերով՝ միջազգային կառույցները, եվրոպացի պաշտոնյաներն ինչ ուզում են ասեն, մենք երկրի ներսում լուրջ խնդիրներ ենք տեսնում։ Խորհրդարանի կողմից ընդունվում են օրենքներ, որոնք ճիշտ եվրոպացի պաշտոնյայի նկարագրածի հակառակն է։ Օրենսդրորոեն փակվում են կառավարության նիստերը, միայն երկրորդ ընթերցմամբ օրենք է ընդունվում, որը, ըստ էության, խոսքի ազատության սահմանափակմանն է միտված։ «Աշխատանքի փակ ռեժիմի անցում կատարելը, չեմ կարծում, որ ժողովրդավարության արտահայտում է, ինչպես փորձում են ներկայացնել բարձրաստիճան պաշտոնյաները։ Մեզանում ժողովրդավարությանը չի նպաստում նաև այն հանգամանքը, որ մեր երկրում Սահմանադրությունը փոխվեց Սերժ Սարգսյանի՝ իշխանության գլխին մնալու համար միայն։ Եվ առհասարակ՝ մեր երկրում ցանկացած օրենք փոփոխվում է իշխող ուժերին հարմարեցնելու համար, և հանրային շահը բացարձակ գերակա չէ։ Այս պարագայում տեղին է հիշել այն ասացվածքը, որ ինչքան էլ հալվա ասես, բերանդ չի քաղցրանա»,- ընդգծեց Մելիքյանը։
Աշոտ Մելիքյանի խոսքերով՝ ԵՄ-ի հետ համաձայնագրի ստորագրումից հետո մենք ականատես ենք լինում բոլորովին այլ գործելաոճի, ընդունվում են ռեգրեսիվ բնույթի օրենքներ։ «Մեր իշխանությունները վաղուց են որդեգրել գործելաոճը, որ կարևորը լավ թուղթ պատրաստելն է»,- ասաց Մելիքյանը։
Նա նաև նշեց, որ մտահոգիչ է միջազգային կառույցների որդեգրած քաղաքականությունը այս հարցում։ Եվրոպական կառույցները չցանկանալով իշխանությունների հետ հարաբերությունները փչացնել, ջանասիրաբար չեն ուսումնասիրում իրական վիճակը. «Բայց իշխանություններին պահանջներ ներկայացնելու իրավունքը առաջնահերթ մերն է։ Մենք պետք է առաջին հերթին քայլեր ձեռնարկենք և հույսներս չդնենք, որ մեզ դրսից կօգնեն»։
Առավել մանրամասն՝ տեսանյութում։
