«Վերջին երկու տարվա ընթացքում, երբ Վիգեն Սարգսյանը նշանակվել է պաշտպանության նախարար՝ փորձ է արվում որոշակիորեն հանրությանը մատուցել այնպիսի տեղեկություններ, որոնք միտված են, թե իբրև ՀՀ ԶՈՒ-ում տոտալ պայքար է գնում կոռուպցիայի և կոռուպցիոներ պաշտոնյաների դեմ․ այդ գեղեցիկ շարադրված խոսքերը մի բան են, բայց իրականությունը բոլորովին այլ է»,- «Առաջին լրատվական»-ի հետ զրույցում շեշտեց փաստաբան Նորայր Նորիկյանը։
Վերջինիս խոսքերով՝ փոքրիկ ձկներն են հայտնվում կարթում, իսկ այն մեծ շնաձկները, ովքեր թաթախված են կոռուպցիոն սխեմաների մեջ, հանդիսանում են կոռուպցիոն բուրգի անդամներ և իսկապես խաթարում են պետական համակարգի արդյունավետ գործունեությունը՝ այդ մարդիկ փաստաբանի համոզմամբ, ոչ միայն պատասխանատվության չեն ենթարկվում, այլև շարունակում են պաշտոնավարել և շարունակում են մնալ կոռուպցիոն սխեմաների ճարտարապետների շարքում։
«Չկա գեթ մեկ հայտնի անձ, ով թաթախված լինելով կոռուպցիոն գործընթացների մեջ՝ ենթարկվել է քրեական պատասխանատվության, իսկ փոքրիկ տրամաչափի քննիչներ, դատավորներ կամ դատախազներ` այո, կան և կլինեն, որ պատժի կենթարկվեն, սակայն խոսքը նրանց մասին չէ, այլ խոսքը վերաբերում է ձևավորված այդ համակարգը ջարդելուն և այս առումով , ցավոք սրտի, մենք արդյունք չունենք»,- ընդգծեց Նորիկյանն ու այս համատեքստում հավելեց նաև, որ կոռուպցիայի դեմ չեն պայքարում շարքային ռամիկին կալանավորելով։
«Կոռուպցիան այնպիսի լուրջ վնասակար միջավայր է, որտեղ անզորները տեղ չունեն և այնտեղ գտնվում են զորավորները և հենց այդ զորավորներին մեկուսացնելու խնդիր կա, բայց կարծում եմ, որ այսօր ՀՀ քաղաքական իսթաբլիշմենթի առջև այդպիսի խնդիր չկա դրված, որովհետև բոլորի համար էլ պարզ է, որ իրենք իրենց չեն կարող ձերբակալել, հետևաբար պետք է համակարգային փոփոխություն տեղի ունենա, որպեսզի դրա արդյունքում մենք կարողանանք որակական փոփոխության մասին խոսել»,-ասաց նա։
Մանրամասները՝ տեսանյութում։
