Նոյեմբերի 22-ին ՀՀ ԱԺ նախագահ Հովիկ Աբրահամյանն առանձնազրույց է ունեցել Ուրուգվայի արտաքին գործերի նախարար Լուիս Ալմագրոյի հետ:
ՀՀ ԱԺ հասարակայնության և տեղեկատվության միջոցների հետ կապերի վարչությունից «Առաջին լրատվական»-ին հայտնում են, որ Ուրուգվայի արտաքին գերատեսչության ղեկավարը կարևորել է Հայաստանի խորհրդարանի նախագահի առաջին պաշտոնական այցը Ուրուգվայ և վստահություն հայտնեց, որ այն նոր որակ կհաղորդի հայ-ուրուգվայական բարձր մակարդակի հարաբերություններին: Նրա համոզմամբ` միջխորհրդարանական կապերը կարևոր դեր և նշանակություն ունեն միջպետական հարաբերությունների զարգացման գործում: Լուիս Ալմագրոն շեշտել է, որ Ուրուգվայի իշխանությունները մեծ հարգանքով և ջերմությամբ են վերաբերվում հայ համայնքին:
Հովիկ Աբրահամյանը բարձր է գնահատել բարեկամ Ուրուգվայի հետ Հայաստանի հարաբերությունները, կարևորել է միջխորհրդարանական կապերի հետագա խորացումը և տարբեր բնագավառներում փոխգործակցության ակտիվացումը:
Կողմերը գոհունակությամբ շեշտել են միջազգային ատյաններում երկու բարեկամ երկրների միջև սերտ համագործակցության փաստը` փոխադարձ աջակցության սկզբունքով, ինչը, անշուշտ, շարունակական բնույթ կկրի:
ԱԺ նախագահը շնորհակալություն է հայտնել պարոն Ալմագրոյին 2011թ. սեպտեմբերին Մոնտեվիդեոյում կայացած Ուրուգվայի Հայ ազգային խորհրդի և Ուրուգվայ-Հայաստան միջխորհրդարանական բարեկամության խմբի կողմից կազմակերպված համաժողովի ժամանակ ղարաբաղյան խնդրի վերաբերյալ հնչեցրած տեսակետի համար: Նա մասնավորապես ասել էր.
«Լեռնային Ղարաբաղը եղել և ներկայումս էլ անմիջականորեն կապված է Հայաստանին, նրա հայ բնակչությանը, և Ղարաբաղի անկախությունը կամ ապագայում Հայաստանին միանալը լավագույն ճանապարհն է Լեռնային Ղարաբաղի համար»: Արձագանքելով պարոն Աբրահամյանին` Ուրուգվայի արտգործնախարարը նշել է, որ Ուրուգվայը, առաջինը ճանաչելով և դատապարտելով Հայոց ցեղասպանությունը, հիմք դրեց Ցեղասպանության ճանաչման միջազգայնացման գործընթացին և հավելել որ այժմ էլ պատրաստակամ է օժանդակելու Հայաստանի շահերին առնչվող յուրաքանչյուր հարցում:
Հանդիպման ընթացքում քննարկվել են այլ հարցեր ևս:
