Ամերիկյան Ֆլորիդա նահանգում Powerball վիճակախաղով 16 մլն դոլար շահած անհայտ անձն այդպես էլ չի գնացել մրցանակի հետևից: Այս մասին հայտնում է ITAR-TASS-ը: Այժմ արդեն երջանիկ տոմսը դարձել է անվավեր, և այն շահած անձն այլևս չի կարող ստանալ գումարը:
Վիճակախաղի կազմակերպիչներից մեկի խոսքով՝ նման դեպքերը հազվադեպ են: «Գաղափար չունենք, թե ինչու ոչ ոք չի եկել գումարի հետևից: Ըստ ամենայնի՝ շահողը պարզապես մոռացել է տոմսի մասին կամ դեն նետել այն»,-նշել է կազմակերպիչներից մեկը:
Շահող տոմսը գնվել էր այս տարվա մայիսին Տամպա քաղաքի սուպերմարկետներից մեկում: Վիճակախաղի կանոններով՝ ջեք-փոթը շահողն ուղիղ կես տարի ժամանակ ունի՝ շահումը ստանալու համար:
ԶԼՄ-ների փոխանցմամբ՝ դա ամենամեծ չպահանջված շահումն է Ֆլորիդայում 2003-ից ի վեր: Այն ժամանակ իր մրցանակը չէր վերցրել 53.7 մլն դոլար շահողը:
