Ըստ Ազգային վիճակագրական ծառայության տվյալների՝ 2017թ-ին Հայաստանում արձանագրվել է 7․5 տոկոս տնտեսական աճ։ Մինչդեռ նկատենք, որ թե Համաշխարհային բանկի, թե նաև ՀՀ կենտրոնական բանկի կանխատեսումների՝ Հայաստանում տնտեսական աճը 2017թ-ի համար կազմելու էր 3․5-ից 4 տոկոս։
Անդրադառնալով այս հակասությանն ու հրապարակված պաշտոնական տվյալներին, «Առաջին լրատվական»-ի հետ զրույցում տնտեսագետ Վահագն Խաչատրյանը շեշտեց․
«Կենտրոնական բանկին, Համաշխարհային բանկին կամ Արժույթի միջազգային հիմնադրամին երբևիցե ես չեմ համարել ոչ պրոֆեսիոնալ․ինչ մեղադրանք ուզում է հնչեցնեն այս կառույցների հասցեին, բայց որ նրանք պրոֆեսիոնալ են իրենց գործունեության և իրենց կանխատեսումների մեջ՝ սա միանշանակ է, և այն, որ այդ պրոֆեսիոնալները սխալվեին իրենց կանխատեսումների մեջ՝ դա արդեն մեծ հարց է՝ ինչպե՞ս կարող է պատահել, որ նրանք սխալվեն իրենց կանխատեսումների մեջ․ նշանակում է, որ ոչ թե այդ կառույցներն են սխալվեն իրենց կանխատեսումների մեջ, այլ ներկայացված թվերն այն թվերը չեն։
Այս կառույցները մեղավոր չեն, որովհետև նրանք նայում են ընդհանուր դինամիկան երկրի, թե ինչ է կատարվում, ըստ այդմ կանխատեսում են ու մեկ էլ հանկարծ նոյեմբեր-դեկտեմբեր ամիսներին ներկրումների մի ամբողջ վիճակագրություն է փոխվում։
Մեզ մոտ տարիներ շարունակ մաքսային ծառայությունները զբաղվել են խաբեությամբ, այսինքն՝ ներկրվել է օրինակ հեռուստացույց, բայց ներկայացվել է որպես կավիճ կամ ներկրվել է բանան, բայց ներկայացվել է մեխ և այլն և այլն, բայց քանի որ քաղաքական խնդիր կար՝ պետք է նոր ընտրություններ անցնեին և պետք է ցույց տային թվեր, հետևաբար ասեցին՝ բերեք այդ բոլորը ստվերից հանեք, որ աճ արձանագրենք և հիմա շահերի բախում է տեղի ունենում, քանի որ բոլորս էլ գիտենք, թե մեր երկրում ով ինչի ներկրմամբ է զբաղվում, դրանք բոլորն էլ հայտնի մարդիկ են»։
Մանրամասները՝ տեսանյութում։
