ՀՀԿ գործադիր մարմնի նիստում քննարկվել են ներկուսակցական հարցեր: Բացի այդ, կուսակցության առաջնորդ Սերժ Սարգսյանը ներկայացրել է Ադրբեջանի նախագահ Իլհամ Ալիևի հետ հանդիպման մանրամասները: Այս մասին լրագրողների հետ ճեպազրույցում ասաց ՀՀԿ խոսնակ Էդուարդ Շարմազանովը:
«Սերժ Սարգսյանն այդ հանդիպումը գնահատում է նորմալ, հայկական կողմը՝ որպես խաղաղ բանակցությունների կողմնակից, դրական է գնահատում, որ բանակցությունները վերսկսվեցին: Բազմիցս նշել ենք, որ ԼՂ հակամարտությունը պետք է ունենա միայն խաղաղ կարգավորում, այլ լուծումներ ընդունելի չեն, ոչ միայն Հայաստանի, այլ նաև միջամտող երկրների համար»,- ասաց նա:
Ինչ վերաբերում է Ռուսաստանի նախագահ Վլադիմիր Պուտինի և Թուրքիայի վարչապետ Ռեջեփ Թայիփ Էրդողանի հանդիպմանը, ՀՀԿ խոսնակն ասաց. «Տարածաշրջանային երկրները պետք է շահագրգռված լինեն, որ Հարավային Կովկասում խաղաղություն հաստատվի: Թուրքիան պետք է դադարեցնի Հայաստանի շրջափակումը, պետք է դադարեցնի միակողմանի ադրբեջանամետ դիրքորոշումը, չխառնվի ԼՂ հակամարտության գործին»:
Անդրադառնալով Վիլնյուսի գագաթնաժողովին և Հայաստանի պատվիրակության կազմին՝ Շարմազանովն ասաց, որ արտգործնախարարությունը կտա այդ մասին լիարժեք տեղեկատվություն:
ՀՀԿ խոսնակն խոսեց նաև Հայաստան ՌԴ նախագահի կատարելիք այցի, ինչպես նաև այն բողոքի ակցիաների մասին, որ պատրաստվում են իրականացնել, և ասաց. «Կուսակցությունը գտնում է, որ Ռուսաստանի Դաշնությունը Հայաստանի թիվ մեկ դաշնակիցն է: Մենք շահագրգռված ենք, որ հայ-ռուսական հարաբերությունները զարգանան բոլոր ոլորտներում: Մեր մոտ ժամանում է մեր դաշնակից երկրի նախագահը, մենք ամեն ինչ անում ենք, որ հայ-ռուսական հարաբերությունները զարգանան, մենք պետք է շարունակենք զարգացնել այդ հարաբերությունները նաև նրա այցից հետո»:
Մանրամասները՝ մեր տեսանյութում:
