Երկուշաբթի Եգիպտոսում մեկնարկում են նախագահական ընտրությունները։ Ազգային ընտրական հանձնաժողովի որոշման համաձայն՝ դրանք 3 օր կտևեն՝ մարտի 26-28-ը։ Երկրի շուրջ 96 մլն բնակիչներից ընտրության իրավունք ունեն 59․5 մլն քաղաքացիներ։ Քվեարկության օրերին երկրում 376 ընտրական կոմիտե և շուրջ 17 հազար տեղական հանձնաժողով կգործի։
Առաջին անգամ ընտրատեղամասեր կկազմակերպվեն նաև Հալայիբ քաղաքում, որը գտնվում է Սուդանի հետ սահմանին։ Բանն այն է, որ այս շրջանը «Հալայիբյան եռանկյունու» մի մասն է, որի նկատմամբ հավակնություններ ունեն երկու պետությունները։
Ընտրություններին կհետևի 63 հասարակական և մարդասիրական կազմակերպություն։
Ընտրությունների արդյունքները հայտնի կդառնան ապրիլի 2-ին։ Եթե թեկնածուներից ոչ մեկը ձայների անհրաժեշտ քանակություն չհավաքի, երկրորդ փուլը ապրիլի 24-26-ին տեղի կունենա։
Հիմնական թեկնածուն երկրի գործող նախագահ Աբդել Ֆաթահ աս Սիսին է։
Գործող նախագահի մրցակիցն ընտրություններում 65-ամյա Մուսա Մուստաֆա Մուսան է՝ «Էլ Գադ» կուսակցության առաջնորդը, որը երբեք չի թաքցրել աս Սիսիի նկատմամբ իր համակրանքը։
