Այսօր Երևանում տեղի ունեցավ «Բաց հասարակության հիմնադրամներ-Հայաստան» կազմակերպության և «Բաց հասարակություն Վրաստան» հիմնադրամի կազմակերպած «Վարշավայից դեպի Վիլնյուս. Խաչմերուկներում- Հայաստան և Վրաստան» վերտառությամբ հանրային քննարկումը, որի ժամանակ ներկայացվեցին և քննարկվեցին ԱլԳ ճանապարհային քարտեզի 2012-2013թթ. մշտադիտարկման արդյունքները:
Քննարկման մեկնարկին ելույթի խոսքով հանդես եկավ Հայաստանում Եվրամիության պատվիրակության ղեկավար, դեսպան Տրայան Հրիսթեան: ԵՄ դեսպանը ներկայացրեց ԱլԳ նախագծի նպատակը և իրականացրած ծրագրերը ԱլԳ երկրներում, ապա անդրադարձավ նոյեմբերի 28-29-ին Վիլնյուսում կայանալիք ԱլԳ գագաթնաժողովին և դրա նշանակությանը:
Նա տեղեկացրեց, որ այն շատ կարևոր է լինելու ԱլԳ երկրների հետ հետագա համագործակցության առումով, քանի որ որոշվելու է գալիք 2 տարիների համագործակցության օրակարգը:
Եզրափակելով իր խոսքը և անդրադառնալով սեպտեմբերի 3-ի ՀՀ որոշմանը՝ նա նշեց, որ ԵՄ-ն հարգում է ՀՀ ինքնիշխան իրավունքը: Նա շեշտեց, որ ԵՄ-ն մնում է ՀՀ-ի հետ համագործակցող կազմակերպություն:
«Փորձելու ենք ՀՀ-ի հետ համագործակցության ուղիներ գտնել՝ համաձայն ՀՀ-ի հավակնությունների մակարդակի»,- պարզաբանեց ՀՀ-ում ԵՄ դեսպանը:
