Ուկրաինան կարող է գերագնահատել իր ուժերը Ռուսաստանի և ԵՄ-ի հետ առևտրում, քանի որ չի հաջողվի համատեղել ասոցացման մասին համաձայնագիրը ԵՄ-ի հետ և Մաքսային միությունը: Նման կարծիք է հայտնել RIA Novosti գործակալությանը Կիևում ԱՄՆ նախկին դեսպան, Սպիտակ տանը և պետդեպարտամենտում Ռուսաստանի և Ուկրաինայի քաղաքականության հարցերով նախկին պատասխանատու Սթիվեն Փայֆերը:
Հիշեցնենք, որ Ուկրաինան նախօրեին հայտարարել է ԵՄ-ի հետ ասոցացման համաձայնագրի նախապատրաստման դադարեցման մասին:
Փայֆերի կարծիքով՝ դեռևս պարզ չէ, թե ինչ այլընտրանք կառաջարկի Ռուսաստանը:
«Ուկրաինայի համար դա կլինի մեծ հնարավորությունների բացթողում: Կիևում, ըստ ամենայնի, գոյություն ունի հնարավորությունների գերագնահատում այն հարցում, թե ինչպես կարելի է մանևրել ԵՄ-ի և Ռուսաստանի միջև այս կապակցությամբ»,- ասել է փորձագետը:
Նրա խոսքով՝ ամեն ինչ վկայում է այն մասին, որ Ասոցացման համաձայնագիրը չի ստորագրվի Վիլնյուսում հաջորդ շաբաթ կայանալիք գագաթնաժողովին, և այս դեպքում Ուկրաինայի նախագահ Վիկտոր Յանուկովիչը կկորցնի իր համակրանքը ԵՄ շատ առաջնորդների մոտ:
Փայֆերը կարծիք չի հայտնել, թե Ուկրաինայի համար ինչով կարող է շահավետ լինել արտաքին կուրսի փոփոխությունը կամ Ռուսաստանի և ԵՄ-ի հետ մերձենալու միջև հավասարակշռության փորձը: «Պետք է տեսնել՝ արդյոք Ռուսաստանը պատրաստ կլինի՞ ինչ-որ բան առաջարկել: Պարոն Յանուկովիչի համար խնդիրն այն է, որ, ինչպես ենթադրում եմ, ուկրաինացիների մեծ մասը չի ցանկանում վերադառնալ ՄՄ»,- ասել է նա:
Նրա կարծիքով՝ նման դիրքորոշման են հակված նաև Ուկրաինայի բիզնես և քաղաքական էլիտան: Բացի դրանից՝ Փայֆերը նաև կարծում է, որ Կիևը, հրաժարվելով Ասոցացման համաձայնագրից, աջակցություն չի ստանա Արժույթի միջազգային հիմնադրամի հետ նոր վարկեր ստանալու մասին բանակցություններում:
Մեկնաբանելով Ռուսաստան-Ուկրաինա-ԵՄ եռակողմ բանակցությունների հնարավորությունը՝ փորձագետը նշել է, որ ամբողջությամբ չի ըմբռնում բանակցությունների թեմատիկան:
«Չեմ կարծում, որ նման քննարկումը կարող է լուծել հարցը, որը ես հիմնարար եմ համարում. չի կարելի ԵՄ-ի հետ Ասոցացման համաձայնագիրը համատեղել ՄՄ-ի հետ անդամակցությանը»,- հավելել է Փայֆերը:
