Վլադիմիր Պուտինի Հայաստան կատարելիք այցին Գյումրին առանձնահատուկ ոգևորությամբ է պատրաստվում: Ամենուրեք ասֆալտապատման, մաքրման աշխատանքներ են: Վերանորոգվում է նաև Դրամատիկական թատրոնի շենքը, որտեղ պետք է անցկացվի Հայ-ռուսական տնտեսական ֆորումը, ինչի համար էլ հենց Պուտինն այցելելու է Գյումրի: Գյումրիում տիրող աժիոտաժի և առհասարակ Պուտինի այցի շուրջ «Առաջին լրատվական»-ը զրուցեց Գյումրիի նախկին քաղաքապետ Վարդան Ղուկասյանի հետ:
– Պարոն Ղուկասյան, ինչպե՞ս եք գնահատում Պուտինի այցը:
– Շատ լավ եմ գնահատում, շատ կարևոր այց է, որովհետև այսօր մենք գիտենք ինչպիսի թշնամիներ ունենք, ինչպիսի հարևաններ ունենք, և նմանատիպ մեծ երկրի նախագահի այցը Հայաստան, Գյումրի վերին աստիճանի կարևորում եմ: Դա մեր անվտանգության խնդիրն է:
– Եթե Պուտինը չգար, չէի՞ն մաքրվելու Գյումրիի փողոցները:
– Դա երևի ինձ չպետք է հարցնեք:
– Իսկ արդեն հաստատվա՞ծ է, որ Պուտինն իսկապես կայցելի Գյումրի:
– Շատ լավ կլինի, որ այցելի: Մեդվեդևն էլ է այցելել, Գորբաչովն էլ է այցելել, Նիկոլայ ցարն էլ է այցելել Գյումրի: Գյումրին կարևոր նշանակություն ունի, 102-րդ ռազմաբազա և այլ: Յուրաքանչյուր գյումրեցու համար դա շատ կարևոր է: Երբ մենք այստեղ տեսնում ենք ռուսական զինվոր, մեզ շատ լավ ու ապահով ենք զգում: Ու քանի որ Գյումրիում տուրիզմը շատ վատ վիճակում է, ռուսների ներկայությունը կխթանի տուրիզմի զարգացմանը:
– Ինչո՞վ կարող է ռուսների ներկայությունը խթանել տուրիզմի զարգացմանը:
– Ռուսների շատացումը ինքնըստինքյան կխթանի տուրիզմի զարգացմանը: Գյումրեցիները էն ժամանակ էլ ռուսներով լավ ապրել են: Մեր մեծերը` Թումանյանը, Իսահակյանը գտել են, որ մեզ պետք է միասին լինել ռուսների հետ, բարեկամությունը պարտադիր պետք է լինի: Ուրիշ ո՞ւմ հետ:
– Եվրոպական հեռանկարը Ձեզ հավատ չէ՞ր ներշնչում:
– Դե հո չենք ասում մեր կապերը կխզենք Եվրոպայի հետ: Եվրոպայի հետ մեր կապերի պահպանման քաղաքականությունը ներկայումս շատ լավ տանում է հանրապետության նախագահը: Արտաքին քաղաքականությունը շատ լավ առաջ է գնում: Բայց էդ գենդերային հավասարություն-բան, որը Եվրոպայից է գալիս, ապուշություն, հիմարություն, այլասերվածություն, պոռնկություն, անեծք, աստվածային պատիժ է: Դա քննարկման թեմա չէ: Իսկ ով էլ որ քննարկում է, նրանց պետք է լցնել կրակը և այրել: Եվ մեր բոլոր սուրբ կաթողիկոսները նմանատիպ մարդկանց այրում էին, վերացնում էին երկրի վրայից: Դրանք ընդհանրապես այլասերված մարդիկ են, որոնց պետք է վերացնես երկրի վրայից, որ Աստծո պատիժը չթափվի երկրի գլխին, և աշխարհի վերջը չլինի: Ինչքան այլասերվածություն կա, Եվրոպայից է գալիս: Իսկ Ռուսաստանը հեռանկարային է: Ռուսաստանում հայերն ավելի արտոնյալ վիճակում են, քան մյուս ազգերը: Ես շատ եմ շփվում այդ շրջանակների հետ, գիտեմ:
– Պարոն Ղուկասյան, մամուլում գրվեց, որ փորձ է արվում Գյումրին «փակ քաղաք» սարքել: Ինչպե՞ս եք վերաբերվում դրան:
– Ճիշտն ասած, չեմ ընդունում դա: Փակ քաղաքը շատ պրոբլեմային կլինի: Մեր Լենինականը եղել է փակ քաղաք: Մեր պապերը, մեր հայրերն ասում էին, որ երբ բացեցին քաղաքը, մարդիկ շատ ուրախացել էին: Սովորական ժողովուրդը փակ քաղաքում իրեն լավ չի զգա: Ես դեմ եմ դրան, լավ չի լինի: Տուրիզմին կվնասի, ապրանք ներկրել, արտահանելուն կվնասի: Ես չեմ էլ հավատում, որ կփակվի, քանի որ բան չկա, որ փակվի: Էս որ դարն է…խորհրդային ժամանակները վաղուց անցել են:
– Ռուսաստանը վերջին շրջանում 3000-ով ավելացրեց իր զինվորների թիվը Գյումրիում: Ինչպե՞ս եք գնահատում այդ քայլը:
– Շատ լավ է: Տա Աստված` ավելանա այդ թիվը: Դուք գիտեք, թե Հարություն Զիմզիմովն ինչ է ասել` շատ սալդատ, շատ փոդրաթ: Ռուսները 3 անգամ ավելի աշխատավարձ են ստանում, քան մեր ժողովուրդը: Կստանան, մեր երկրի մեջ կծախսեն փողերը: Շատ լավ է, ինչ եք ուզում: Ես գիտեմ, որ շատ լավ է, թող ընտանիքներով գան, տեղավորվեն, հիանալի կլինի: Նիկոլայ ցարի ժամանակներից շենքեր կան, կգան կվերակառուցեն իրենց սարքածը: Շատ լավ է: Ես գտնում եմ, որ մեր փրկությունը ռուս ազգի հետ եղբայրության մեջ է, մինչև վերջ, որովհետև մենք ունենք սատանա հարևաններ: Մի քրիստոնյա հարևան ունենք, էն էլ տեսնում ենք` երբեմն ինչեր է անում մեր գլխին: Ռուսաստանը մեր գոյի պայքարի միջոցն է: Նախ պետք է մեր գոյի մասին մտածենք, հետո նոր երշիկի ու իկրայի:
– Իսկ Պուտինի այցից սպասելիքներ ունե՞ք:
– Ես կուզենայի, որ լավ ներդրումներ աներ, աշխատատեղեր բացեր: Շատ լավ կլիներ:
– Իսկ կփորձե՞ք հանդիպել Պուտինի հետ:
– Ճիշտն ասած, ես…նմանատիպ հարցերի մեջ…չեմ էլ մտածում նմանատիպ հանդիպման մասին: Ճիշտն ասած, հիմա ես քաղաքականությամբ չեմ զբաղվում, աշխատատեղեր եմ ստեղծում, եկեղեցի եմ վերանորոգում, մարդկանց եմ օգնում:
– Պարոն Ղուկասյան, մամուլում գրվեց, որ դուք Գյումրիում Ձեր համար ներքին քաղաքապետարան եք ստեղծել, մարդկանց եք աշխատանքի ընդունել այդտեղ:
– Ճիշտն ասած, ես զարմանում եմ, որ դրան անդրադառնում եք: Եթե մարդը իր շրջապատի, իր փողոցի, իր քաղաքի մարդկանց որոշակի հարցերով, լինի հոգևոր, թե նյութական, կարող է հասնել, դա քննարկման թեմա չէ: Ես այդպես եմ եղել, և լավ կլիներ, որ այդպիսի մարդիկ շատ լինեն:
– Բալասանյանի հետ դեռ լարվա՞ծ են հարաբերությունները:
– Ճիշտն ասած, չեմ էլ ուզում լսել էդ անունը, ոչ էլ քննարկել: Հետագայում ժողովուրդը, հաջորդ քաղաքապետերը կասեն` ով ով էր: Բոլորն էլ դա գիտեն: Մոտեցեք քաղաքում հարցրեք:
– Մամուլում գրվեց, որ Ձեր եղբայրը ընտանիքով արտագաղթում է: Խնդիրնե՞ր ունեք:
– Իմ եղբոր ընտանիքը չի արտագաղթում, մենք բիզնես ունենք դրսում, բայց իմ եղբայրը այստեղ է, մենք պապական գյումրեցիներ ենք: Մենք 1700-ական թվականներից այստեղ ենք: Մենք ամեն ինչ ունենք, մենք փախչելու խնդիր չունենք: Մենք կարող է դուրսուներս անենք, բայց այստեղից ոչ մի տեղ չենք գնա: Ես իմ հոգին այստեղ եմ ավանդելու: Եվ հետո հիշեք` մենք չենք թռնում, մենք թռցնում ենք:
– Ո՞ւմ եք թռցնում:
– Ընդհանրապես, վատ մարդկանց…բայց փախչելը վատ բան է: Ինչ է, երբ պաշտոն ունեի պետք է մնայի, իսկ երբ չունեմ, թողնեմ գնա՞մ: Չէ՛, ես այդպիսին չեմ:
– Իսկ եթե Ձեզ նորից առաջարկ լինի պաշտոն զբաղեցնել, կհամաձայնե՞ք:
– Չէ՛, ես ոչ մի բանի ցանկություն չունեմ: Ոչ էլ ուզում եմ քաղաքականությամբ զբաղվեմ: Ես նախկինում էլ քաղաքականությամբ չեմ զբաղվել, ես պարզապես քաղաքն եմ կառուցապատել, որը հիմա էլ եմ անում:
