Ֆրանսիացի ագարակատերերը տրակտորներով փակել են Փարիզ տանող ճանապարհները: Նրանց խոսքերով՝ ճանապարհները կբացվեն այն ժամանակ, երբ իշխանությունները կատարեն իրենց պահանջները՝ հաղորդում է vesti.ru-ն:
Ցուցարարները փորձել են փակել նաև մայրաքաղաքի կամուրջները, սակայն ոստիկանները թույլ չեն տվել նրանց մուտք գործել քաղաք:
«Մի կողմից՝ մեզ վրա ճնշում են գործադրում հարկերը, մյուս կողմից՝ Կենսաթոշակային հիմնադրամը»,- բողոքում են նրանք:
Կառավարությունը մտադիր է 40%-ով կրճատել հացահատիկ արտադրողներին հատկացվող սուբսիդիաները, կրկնակի հարկել նրանց և այդ ամենին գումարել էկո-հարկ, ըստ որի՝ բեռնատարների սեփականատերերը ստիպված կլինեն վճարել շրջակա միջավայրի աղտոտման համար:
«Մենք չենք ցանկանում համակերպվել կառավարության հետ, որը մեր երկիրը տանում է դեպի տնտեսական անկում, սնանկացնում է ագարակատերերին: Չնայած մենք բոլորս դաստիարակված և քաղաքակիրթ մարդիկ ենք, մենք ուղղակի ստիպված ենք մեր դժգոհությունը նման կերպ արտահայտել»,- ասել է Ֆրանսիայի ագարակատերերի արհմիության նախագահը և հավելել, որ իրենք գործում են նաև ի շահ գնորդների, քանի որ գյուղատնտեսական մթերքների գները աստիճանաբար բարձրանում են:
Բողոքի ակցիա են խոստացել կազմակերպել նաև բեռնատարների վարորդները և մասնավոր ոլորտի աշխատողները: Չի բացառվում, որ շուտով փողոցներ դուրս կգան նաև պետական աշխատողները, որոնք ևս դժգոհ են կառավարության քաղաքականությունից:
