Նախագահ Սերժ Սարգսյանի այսօրվա հրամանագրով գեներալ-լեյտենանտ Հայկազ Բաղմանյանը նշանակվել է Հավաքական անվտանգության պայմանագրի կազմակերպության (ՀԱՊԿ) միացյալ շտաբի պետի տեղակալ` կնքելով զինվորական ծառայություն անցնելու մասին նոր պայմանագիր` երեք տարի ժամկետով։ Անցած տարվա վերջին Հայկազ Բաղմանյանի պաշտոնանկությունը ՀՀ ԶՈւ շտաբի պետի տեղակալի պաշտոնից բուռն քննարկումների և վերլուծությունների տեղիք տվեց. Բաղմանյանը օլիգոպոլ համակարգի ամենանշանային և օդիոզ կերպարներից մեկն էր: Այս համատեքստում գեներալի հեռացումը Զինված ուժերից միայն դրական ազդակ կարող էր լինել: Հարցն ուշագրավ էր այլ հարթության վրա. արդյո՞ք դա բանակային բարեփոխումների հրապարակային ազդակ էր, թե՞ ընդամենը սիտուատիվ քայլ էր, որն ուղղված էր կարճաժամկետ խնդրի լուծմանը, ասենք` պաշտպանության նախարար Վիգեն Սարգսյանի ինքնահաստատմանը կամ բանակում նրա դիրքերի ամրապնդմանը:
Սերժ Սարգսյանն այսօր անուղղակիորեն տվեց հարցի պատասխանը. համակարգը չի հրաժարվում Հայկազ Բաղմանյանի ծառայություններից: Ուշագրավ է, որ Սերժ Սարգսյանը Բաղմանյանի վերաբերյալ նշանակումը կատարեց իր վարչապետության հեռանկարը, ըստ էության, հաստատող հրապարակային հայտարարությունից հետո: Սա հետաքրքիր է այն առումով, որ մոտավոր պատկերացում է տալիս Սարգսյանի վարչապետության գոնե առաջին շրջանի քաղաքականության, նրա նոր իշխանության ստատուս-քվոյի վերաբերյալ: Սերժ Սարգսյանն այս փուլում փորձում է կոնսոլիդացնել համակարգային բոլոր սեգմենտներին և գոնե առաջիկա ամիսներին հազիվ թե գնա կադրային արմատական փոփոխությունների, ինչն էլ, իր հերթին, հիմքեր չի տալիս ենթադրելու, որ մոտ ապագայում համակարգային, ինստիտուցիոնալ բարեփոխումների ակնկալիք կա: Սերժ Սարգսյանը, որպես կանոն, արդյունավետ կառավարումն ու բարեփոխումները ստորադասում է համակարգային կոնսենսուսին և կայունությանը ու հիմքեր չկան ենթադրելու, որ իշխանավարման երրորդ ժամկետում վարքագծային էական փոփոխություններ են լինելու:
Մյուս կողմից` Հայկազ Բաղմանյանը, թեկուզև Սերժ Սարգսյանի հրամանագրով, վերադառնում է ոչ թե Հայաստանի իշխանություն, այլ ՀԱՊԿ կառույցներ: Սերժ Սարգսյանը, փաստորեն, անուղղակի վերաբերմունք է ձևավորվում ՀԱՊԿ-ի, նրա ինստիտուտների նկատմամբ` դրանք դարձնելով Հայաստանի իշխանության «պահեստայինների» նստարան, որտեղ ուղարկում է իր իշխանության կադրային «խոտանին»: Մյուս կողմից` անցած տարեվերջին Սերժ Սարգսյանը «Արմենիա»-ին տված հարցազրույցում չէր բացառել իշխանությունից «ֆիլտրված» որոշ գործիչների վերադարձի հնարավորությունը: Գուցե Սերժ Սարգսյանը տալիս է այս գործընթացի մեկնարկը` հասկացնելով, որ հավատարմության պարագայում «համաներման» շանս ունեն նաև մյուսները, եթե դա տեղի է ունենում նույնիսկ սկանդալային և Էպատաժային Բաղմանյանի պարագայում:
