Ադրբեջանն ու Բելառուսը բացարձակապես ոչ մի խնդիր չունեն միջազգային համագործակցության մեջ՝ հինգշաբթի Բաքվում հայտարարել է Բելառուսի նախագահ Ալեքսանդր Լուկաշենկոն՝ ելույթ ունենալով Ադրբեջանի նախագահ Իլհամ Ալիևի հետ համատեղ բրիֆինգի ժամանակ: Այս մասին փոխանցում է Trend գործակալությունը:
Լուկաշենկոյի խոսքով՝ իրենք ունեն աշխարհակարգի վերաբերյալ նույն հայացքները, ներկայում աշխարհում գոյություն ունեցող խնդիրների վերաբերյալ՝ նույն տեսակետները:
«Մենք մշտապես աջակցել ենք ու կաջակցենք միմյանց միջազգային կազմակերպություններում խնդրահարույց հարցերի ողջ շրջանակում»,- ասել է Լուկաշենկոն:
Կողմերն իրենց առջև դրել են երրորդ երկրների շուկա դուրս գալու և համատեղ արտադրանքը վաճառելու խնդիր: Որպես կողմերի միջև համագործակցության նոր ուղղություն՝ Լուկաշենկոն նշել է Բելառուսում ադրբեջանցի գործարարների ակտիվ ներդրումները: Երկու երկրների նախագահները համաձայնության են եկել տարբեր ոլորտներում համագործակցության ընդլայնման շուրջ: Նշվում է նաև, որ Լուկաշենկոն Ալիևին Մինսկ է հրավիրել:
