Կառավարության շենքի դիմաց հավաքված են հարյուրավոր երիտասարդներ, ովքեր բողոքում են պարտադիր կուտակային կենսաթոշակային համակարգի դեմ: Հավաքվածների մեջ են «Նիկոլ Աղբալյան» ուսանողական միության անդամները, ՏՏ ոլորտի ներկայացուցիչներ և պարզապես քաղաքացիներ:
Վերջիններս արդեն նամակ են փոխանցել կառավարությանը: Նրանք պահանջում են, որպեսզի օրենքը գոնե մեկ տարով հետաձգվի՝ այն կետ առ կետ քննարկել կարողանալու և համաձայնության գալու համար: Երիտասարդների ձեռքերին փուչիկներ են, որոնք համարում են կենսաթոշակային նոր համակարգի խորհրդանիշ:
Բողոքող երիտասարդների առանձին խմբերի հետ զրուցեց կառավարության նամակների բաժնի աշխատակից Ալեքսանդր Ղազարյանը: Թեև ակտիվիստները պահանջում էին խոսել բարձրախոսով, որպեսզի լսելի լինի բոլորի համար, սակայն նրանց պահանջը անտեսվեց:
ՏՏ ոլորտի մասնագետները նշում են, որ այս օրենքից հատկապես տուժելու են իրենք: Նրանք նաև նշում են, որ օրենքի ընդունումը կարող է արտագաղթի նոր ալիքի պատճառ դառնալ: Ակցիայի մասնակիցները պատրաստվում են դեռ մեկ ժամ էլ մնալ կառավարության առջև՝ սպասելով կառավարության որևէ ներկայացուցչի: Նրանք հայտնում են, որ պատրաստվում են նմանատիպ ակցիաները դարձնել ամենշաբաթյա և շարունակել այնքան ժամանակ, քանի դեռ իրենց պահանջները չեն կատարվել:
Ակցիան վերահսկում են մեծ թվով ոստիկաններ:
Լուսանկարները` PanARMENIAN Photo-ի
