Ճապոնիայի կառավարությունն ակնկալում է ընդլայնել իր տարածքային ջրերը՝ Խաղաղ օվկիանոսում խոշոր հրաբխային գոյացության ի հայտ գալու արդյունքում, որը կարող է լիարժեք կղզի դառնալ: Այս մասին այսօր Տոկիոյում մամլո ասուլիսի ժամանակ հայտարարել է նախարարների կաբինետի գլխավոր քարտուղար Յոսիխիդե Սուգան՝ փոխանցում է ITAR-TASS-ը:
«Եթե այդ գոյացությունը դառնա իրական կղզի, ապա մեր տարածքային ջրերի մակերեսը կմեծանա»,- ասել է նա:
Տոկիոյից 1000 կմ հարավ՝ Օգասավարա կղզու շրջանում, ստորջրյա հրաբխի ժայթքման արդյունքում ի հայտ է եկել նոր կղզյակ, որն ունի 200 մետր տրամագիծ և ծովի մակերևութից մոտ 20 մետր բարձրություն: Տոկիոն դեռևս չի շտապում այն պաշտոնապես գրանցել որպես կղզի: Նախկինում հրաբային նման գոյացություններ բազմիցս հայտնվել են ու անհետացել:
Այսօր երկրի առափնյա պահպանության ծառայությունը կրկին նախազգուշացրել է այդ տարածքում նավարկության վտանգի մասին՝ կապված հրաբխի ակտիվության հետ, որը 600 մետր բարձրության մոխրի սյուն է արձակում:
