Վրաստանի ապագա վարչապետ Իրակլաի Գարիբաշվիլին չորեքշաբթի, խորհրդարանին ներկայացնելով կառավարության ծրագիրը, հայտարարել է, որ երկրի արտաքին քաղաքական կուրսում ոչ մի փոփոխություն չի լինի՝ հաղորդում է Trend գործակալությունը:
Նրա խոսքերով՝ բնակչության մեծ մասն ընտրել է միակ ճիշտ ուղին, և Վրաստանի ապագան կապված է Եվրամիության ու ՆԱՏՕ-ի հետ:
Գարիբաշվիլիի խոսքերով՝ Վրաստանը և նրա կառավարությունը պետք է հաջող բարեփոխումներ անցկացնեն, ժողովրդավարական ինստիտուտներ ստեղծեն և Եվրոպային ապացուցեն, որ երկիրն արժանի է ԵՄ-ին ու ՆԱՏՕ-ին:
«Ուկրաինան և Մոլդովան ավելի շատ են կախված Ռուսաստանից, քան Վրաստանը: Եթե նայենք նախորդ տարիներին, ապա կարելի է տեսնել, թե ռազմավարական ինչ օբյեկտներ են վաճառվել Ռուսաստանին: Ցանկալի կլիներ, որ մենք հարցին ավելի քննադատաբար մոտենայինք այն ժամանակ, ոչ թե հիմա»,- դիմելով պատգամավորներին՝ ասել է Գարիբաշվիլին:
