Ռուսաստանի արտգործնախարար Սերգեյ Լավրովը հայտարարել է, որ ԱՄՆ պետքարտուղար Ջոն Քերիի հետ պայմանավորվել է առաջիկա օրերին հանդիպելու մասին:
«Ես հեռախոսով խոսել եմ ԱՄՆ պետքարտուղար Ջոն Քերիի հետ: Մենք պայմանավորվել ենք հանդիպել առաջիկա օրերին»,- ասել է Լավրովը Մոսկվայում Սիրիայի կառավարության պատվիրակության հետ բանակցությունների ընթացքում՝ փոխանցում է RIA Novosti-ն:
Լավրովի խոսքով՝ ինքը Քերիի կողմից զգացել է «Ժնև 2» գումարելու իրենց նախաձեռնության ուղղությամբ հետևողական աշխատանքի տրամադրվածության հաստատում:
Լավրովը նշել է, որ Ռուսաստանը սիրիական հարցով շարունակում է կապ հաստատել տարածաշրջանի երկրների հետ: «Ռուսաստանի Դաշնության նախագահը և´ անձամբ, և´ հեռախոսով շփվում է տարածաշրջանի բոլոր հիմնական առաջնորդների հետ»,- նշել է Լավրովը: Նա հիշեցրել է, որ մոտ ժամանակներս շփումներ են տեղի ունեցել Սաուդյան Արաբիայի, Հորդանանի և Լիբանանի հետ:
Լավրովի փոխանցմամբ՝ այս շաբաթվա առաջիկա օրերին կկայանա Պուտինի հանդիպումը Իսրայելի վարչապետ Բենիամին Նեթանյահուի և Թուրքիայի վարչապետ Ռեջեփ Թայիփ Էրդողանի հետ:
