2014-ին սպասվում է կատարյալ ձախողում: Այս կարծիքին է ՀՀ նախկին վարչապետ, ԱԺ պատգամավոր Հրանտ Բագրատյանը: «Որևէ ձևով կառավարությունը չի կարողացել ցույց տալ, թե ինչպես է գեներացնելու 5% տնտեսական աճ: Խնայողությունները, կուտակումները, կուտակումների սահմանային արտադրողականությունը իջնում են, բնականաբար՝ վիճակը իսկապես ողբալի է»,- ասաց Հ. Բագրատյանը: Նրա խոսքով՝ այս տարվա համար իշխանությունները կփորձեն 4% ՀՆԱ-ի աճ ցույց տալ, որովհետև դա Տիգրան Սարգսյանի համար լինել-չլինելու հարց է:
«Տնտեսական աճը հաստատ կարող եմ ասել՝ կլինի 2%, արդեն հայտնի են 10 ամսվա տնտեսական ակտիվության ցուցանիշները՝ ՏԱՑ-ը. կլինի 2-ից 2.5-ի արանքում, իրենք կփորձեն նկարել: Բայց եթե 4 նկարեն՝ 2.5-ի փոխարեն, անցյալ տարի էլ 3.8-ի փոխարեն 7.2 էին նկարել, տնտեսական աճում կստացվի 4.9 փուչիկ (3.4+1.5): Այս 4.9-ի կեսը պետք է հանեն արդեն մյուս տարի: Ոնց որ սենց ասեն՝ ոչինչ, այս տարի մյուս տարվա հաշվին աճ տուր, մյուս տարի կտեսնենք»,- ասաց Հ. Բագրատյանը:
Լուսանկարը` PanARMENIAN Photo-ի
