ԱՄՆ-ի Կալիֆոռնիա նահանգի Ռիչմոնդ քաղաքի բնակիչ Խոսե Բարերան պնդում է, որ Google Maps-ի արբանյակային լուսանկարներից մեկի վրա պատկերված է իր սպանված որդու աճյունը, և ընկերությանը խնդրում է հեռացնել լուսանկարը կայքից՝ հաղորդում է KTVU-TV-ն:
Բարերայի որդին՝ 14-ամյա Քևին, սպանվել է 2009թ. օգոստոսին: Ոստիկանությունը նրա աճյունը հայտնաբերել էր Ռիչմոնդում: Հեռուստաալիքին տված հարցազրույցի ժամանակ Բարերան հայտարարել է, որ մի քանի օր առաջ նա բացահայտել է, որ այդ շրջանի արբանյակային լուսանկարի վրա երևում է իր որդու աճյունը: Լուսանկարում պատկերված են նաև ոստիկաններ և ոստիկանական մեքենա: Բարերան հայտարարել է, որ կհասնի այն բանին, որպեսզի ընկերությունը ջնջի լուսանկարը:
«Երբ տեսնում եմ այդ լուսանկարը, թվում է՝ դա տեղի է ունեցել երեկ: Դա ցավ է պատճառում իմ ընտանիքի բոլոր անդամներին»,- ասել է նա:
Հեռուստաալիքը հարցում է անցկացրել փորձագետների շրջանում, որոնց կարծիքով՝ Google-ը, ամենայն հավանականությամբ, չի բավարարի Բարերայի հայցը, քանի որ մշտապես ստանում է բողոքներ այս կամ այն լուսանկարի կապակցությամբ, որոնք արդյունքում չեն ջնջվում:
