Գերմանիայում բնակվող թուրքերը կանցլեր Անգելա Մերկելին ավելի շատ են սիրում, քան Թուրքիայի նախագահ Ռեջեփ Թայիփ Էրդողանին: Այս մասին պարզ է դարձել Գերմանիայում սեպտեմբերին անցկացված համապետական ընտրությունների ժամանակ անցկացված սոցհարցումների արդյունքների հրապարակումից, հայտնում է ermenihaber-ը։
Դուիսբուրգ-Էսսենի ու Քյոլնի համալսարանների կողմից ազգությամբ թուրք, Գերմանիայի քաղաքացի հանդիսացող ընտրողների շրջանում անցկացված հարցումներից պարզ է դարձել, որ նրանց 35 տոկոսը ձայն է տվել «Սոցիալ դեմոկրատական» ու «Ձախերի» կուսակցություններին, իսկ Թուրքիայի իշխող «Արդարություն և զարգացում» կուսակցության հետ լավ հարաբերություններ ունեցող «Գերմանացի դեմոկրատների դաշինքին» սատարել է նրանց 12 տոկոսը:
Հարցման կազմակերպիչները մասնակիցներին խնդրել են Էրդողանին գնահատել նվազագույնը -5 և առավելագույնը +5 գնահատականով: Էրդողանի միջին գնահատականը կազմել է -2.5: Նույն չափորոշիչներով գնահատված Մերկելի միջին գնահատականը կազմել է +1.5:
Մասնակիցների 66 տոկոսը դեմ է արտահայտվել Թուրքիայի եվրաանդամակցությանը։
