Իտալիայում տնտեսական ճգնաժամի հիմնական պատճառներիս մեկը վիթխարի հարկային բեռն է, որի պատճառով երկիրը վատագույն անկումն ունի Տնտեսական համագործակցության և զարգացման կազմակերպության 34 երկրների շարքում: Այս մասին գրում է The Wall Street Journal-ը:
Պարբերականն ուշադրություն է հրավիրում, որ Իտալիան դեռևս չի կարողանում դուրս գալ ռեցեսիայից, իսկ գործազրկության մակարդակը երկրում ամենաբարձրն է 1970-ականներից ի վեր: WSJ-ն ընդգծում է, որ երկրի անարդյունավետ հարկային համակարգը տնտեսությանը պարզապես հնարավորություն չի տալիս վերականգնվել:
Ըստ այդմ՝ Իտալիան մնում է ՀՆԱ ծավալով եվրոգոտու 4-րդ երկիրը, և այժմ հենց նրա խնդիրները կարող են որոշել արժութային բլոկի ճակատագիրը: Թերթը նշում է, որ երկրի պետպարտքը ներկայումս Եվրոպայում ամենամեծն է Հունաստանից հետո: Պարբերականը գրում է, որ եվրոպացի քաղաքական գործիչները փորձում են ստիպել Հռոմին՝ բարեփոխումներ անցկացնել և սկսել նվազեցնել պարտքը:
Երկրի հարկային համակարգի հիմքում ընկած են աշխատավարձերից պահվող հարկերը, որոնք վճարում են և´ ընկերությունները, և´աշխատողները: Պարտադիր վճարները կազմում են աշխատավարձերի 33 տոկոսը՝ ԱՄՆ-ի 13 տոկոսի դիմաց:
Այդ հարկերի միջոցով ֆինանսավորվում է երկրի կենսաթոշակայն համակարգը: Կենսաթոշակների վրա ծախսվում է ՀՆԱ 13 տոկոսը՝ եռակի ավել Գերմանիայի, և կրկնակի ավել՝ ԱՄՆ-ի ցուցանիշներից:
Այս ամենի պատճառը երկրի քաղաքացիները համարում են ոչ թե բիզնեսը, այլ քաղաքական իրավիճակը:
