Իրաքի խորհրդարանը հաստատել է ԴԱԻՇ ահաբեկչական խմբավորման դեմ հաղթանակից հետո առաջին բյուջեն՝ չնայած քուրդ պատգամավորների կողմից քվեարկության բոյկոտմանը։ Նրանք դեմ են հանդես եկել Քրդստանի բուջետային վճարները մոտ 5 տոկոսով կրճատելուն։
Քրդերը հույս ունեն, որ իրենց կհաջողվի համոզել դաշնային իշխանություններին, քանի որ մինչ բյուջեի վերջնական ընդունումն անհրաժեշտ է երկրի նախագահի ստորագրությունը։ Ձախողման դեպքում սպառնալիքի տակ կարող է հայտնվել կոնֆլիկտի կարգավորումը։ Այն Էրբիլի և Բաղդադի միջև առաջացել էր Իրաքյան Քրդստանի անկախության մասին հանրաքվեի արդյունքում։ Բյուջեից դժգոհ են ոչ միայն քրդերը։ Փաստաթուղթը, որը պետք է պատերազմից հետո պաշտոնապես համախմբեր իրաքյան հասարակությանը, կռվախնձոր է դարձել քաղաքական գործիչների համար՝ խորհրդարանական ընտրություններից 2.5 ամիս առաջ։
Բյուջեի ծավալը կազմում է 88 մլրդ դոլար։ Բյուջեն նախատեսում է եկամտահարկի, գույքահարկի, համացանցի, հեռախոսակապի օգտագործման, ավտոմեքենաների ներկրման և այլ հարկերի բարձրացում։ Ընդդիմությունը մեղադրում է կառավարությանն Իրաքի պատմության վատագույն բյուջեի մշակման մեջ։
Բյուջեն հաշվարկված է 46 դոլարով նավթի՝ օրական 3.8 մլն բարել ծավալի արտահանման կախատեսումների վրա։
Բաղդադի համար քրդերին զիջումների գնալը կնշանակի «բացել Պանդորայի արկղը»։ Բյուջեի համար պայքարում շիայական կուսակցությունները պահանջել են հարավային նահանգների զարգացման համար հավելյալ միջոցների հատկացում, ինչպես նա արտոնություններ «Հաշդ աշ-Շաաբի» (ժողովրդական աշխարհազոր) համար։ Սուննիներն իրենց հերթին բյուջեի ավելացում են պահանջել ԴԱԻՇ-ից ազատագրված շջանների վերականգնման համար։ Եվ եթե վերակառուցման համար գումար գտնվել է, ապա աշխարհազորի համար հավելյալ միջոցներ չեն հատկացվել։ Վաշինգտոնն իր հերթին պահանջում է աշխարհազորի զինաթափում։ Հավասարակշռությունը պահպանելն իշխանությունների համար գնալով ավելի ու ավելի է բարդանում։
