Գերմանիայի կանցլեր Անգելա Մերկելը և ԱՄՆ նախագահ Դոնալդ Թրամփը հեռախոսազրույցում քննարկել են ՌԴ նախագահ Վլադիմիր Պուտինի ելույթը, որի ընթացքում նա հայտարարել էր ՌԴ-ում նորագույն զինահամակարգերի ստեղծման մասին: Այս մասին ասված է գերմանական կառավարության ներկայացուցիչ Շտեֆան Զայբերտի հայտարարության մեջ։
«Գերմանիայի կանցլերը և ԱՄՆ-ի նախագահն անհանգստացած են այն զինահամակարգերի բնագավառում մշակումների վերաբերյալ ՌԴ նախագահ Պուտինի հայտարարություններից, որոնք բացասական ազդեցություն կունենան սպառազինությունների վերահսկողության բնագավառում միջազգային հանրության ջանքերի վրա»,-նշվում է փաստաթղթում:
Մերկելը և Թրամփը նաև քննարկել են Սիրիայի իրադրությունը և կոչ են արել Ռուսաստանին «դադարեցնել մասնակցությունը Արևելյան Ղուտայի ռմբակոծումներին և հասնել Ասադի ռեժիմի կողմից իրականացվող հարձակողական գործողությունների դադարեցման»: Նրանք կոչ են արել Մոսկվային ճնշում գործադրել Սիրիայի նախագահ Բաշար Ասադի կառավարության վրա։
«Նրանք համակարծիք են եղել, որ սիրիական ռեժիմին և նրա ռուս ու իրանցի դաշնակիցներին պետք է կոչել ՄԱԿ-ի Անվտանգության խորհրդի 2401 բանաձևի ամբողջական կատարման»,-նշել է Զայբերտը:
