Աժ փոխխոսնակ Էդուարդ Շարմազանովը «Ելք» դաշինքի անդամներին, Նիկոլ Փաշինյանին հորդորում է ժուլիկներ, ժուլիկություն փնտրել այլ տեղ, գուցե կգտնեն իրենց շրջապատում։ Նշենք՝ Փաշինյանը հիշեցրել է, որ Ս․Սարգսյանը հանրաքվեից առաջ պաշտոնապես հայտարարել է, որ ինքը չի առաջադրվելու վարչապետի պաշտոնում, նախագահի պաշտոնում, և կարծում է, որ երրորդ անգամ որևէ անձի կողմից պետության կառավարողի դերին հավակնելը սխալ է։ «Եթե Սերժ Սարգսյանը պիտի հայտարարի, որ ինքը ստախոս ա և քաղաքական ժուլիկ, թող հայտարարի»,- ասել էր նա։
«Առաջին լրատվական»-ի հետ զրույցում Էդուարդ Շարմազանովը նշեց, որ «եթե»-ներով հարցերին անդրադառնալը, առնվազն, լուրջ չէ։
«Երրորդ ժամկետին վերաբերող խոսակցությունը ևս համարում եմ անհեթեթություն, որովհետև Հայաստանում չի կարող լինել 3-րդ ժամկետ, քանի որ մենք այլևս ուղիղ նախագահի ընտրություն չենք կատարում։ Կատարել ենք և կատարում ենք խորհրդարանի ընտրություն, որտեղ ընտրում են կուսակցություններ, որտեղ պատասխանատուն ոչ թե մեկ հոգի է, այլև պատասխանատուն քաղաքական թիմերն են, հետևաբար որևէ գործչի, այդ թվում՝ Սերժ Սարգսյանի 3-րդ ժամկետի մասին խոսելը, քաղաքագիտական առումով անհիմն է, որովհետև պատասխանատուն լինելու է ոչ թե ԱԺ նախագահը, վարչապետը, կամ երկրի նախագահը, այլ քաղաքական կոալիցիան՝ մեծամասնությունը։ Ով մոռացել է, հիշեցնում եմ՝ ապրիլի 9-ից ՀՀ-ն ամբողջությամբ տեղափոխվում է պառլամենտարիզմի ժամանակաշրջան, որտեղ ոչ թե մի հոգի, այլ քաղաքական մեծամասնությունն է որոշում, որն ունի ուղիղ վերահսկողական ֆունկցիաներ և՛ կառավարության, և՛ մասնավորապես վարչապետի գործունեության վերաբերյալ»,- շեշտեց նա։
Մանրամասները՝ տեսանյութում։
