ԵՄ կազմից Մեծ Բրիտանիայի դուրս գալու (Brexit) վերաբերյալ համաձայնագրի տեքստի նախագիծը, որը փետրվարի 28-ին տարածել է Եվրահանձնաժողովը, բովանդակում է դրույթներ, որոնք «սպառնում են Միացյալ Թագավորության սահմանադրական ամբողջականությանը»: Այս մասին բրիտանական խորհրդարանի Համայնքների պալատում հայտարարել է վարչապետ Թերեզա Մեյը:
«Իրավական փաստաթղթի նախագիծը, որը հրապարակել է հանձնաժողովը, գործնականում կխարխլի Մեծ Բրիտանիայի ընդհանուր շուկան և կսպառնա Միացյալ Թագավորության սահմանադրական ամբողջականությանը Իռլանդական ծովում կարգավորող և մաքսային սահմանի ստեղծման ճանապարհով: Եվ Մեծ Բրիտանիայի ոչ մի վարչապետ երբեք չի կարող դրան համաձայնել»,-նշել է նա: Այսօր ավելի վաղ Եվրահանձնաժողովը հրապարակել էր Եվրամիության կազմից Մեծ Բրիտանիայի դուրս գալու վերաբերյալ համաձայնագրի տեքստի առաջին նախագիծը:
Այն Բրյուսելում տարածել է ԵՀ-ի մամուլի ծառայությունը, ճեպազրույցում այն ներկայացրել է ԵՄ-ի գլխավոր բանագնաց Միշել Բառնիեն: «Խոսքը վերաբերում է համաձայնագրի նախագծին: Մենք այս իրավաբանական տեքստն ընթացիկ պահից կքննարկենք ԵՄ-ի 27 երկրների (առանց Մեծ Բրիտանիայի) և Եվրախորհրդարանի հետ: Մենք պետք է բոլոր բանակցություններն ավարտենք աշնանը, որպեսզի հասցնենք համաձայնագիրը վավերացնել ժամանակին»,- հայտարարել է Բառնիեն:
