Բրիտանիայում համացանցի երկու խոշորագույն պրովայդերներ՝ Sky-ը և TalkTalk-ը, ծրագրային հատուկ ֆիլտրեր են տեղադրել՝ սահմանափակելու համար մուտքը պոռնոկայքեր: Այս մասին հաղորդում է Daily Mail-ը:
Ֆիլտրերը կներառվեն ընկերությունների բոլոր նոր բաժանորդների համար նախատեսված ծառայությունների փաթեթում: Ավելի քան 20 միլիոն բաժանորդներ կարող են ընտրել՝ ցանկանո՞ւմ են արդյոք արգելափակել մուտքը պոռնոկայքեր:
Բրիտանիայի մյուս խոշոր ինտերնետ-պրովայդերները՝ BT-ն և Virgin-ը, մինչև 2014թ. սկիզբը նույնպես մտադիր են նմանատիպ ֆիլտրեր տեղադրել:
Նշվում է, որ այս ծառայության ներմուծումը Դևիդ Քեմերոնի կոչի արդյունքն է, ով հայտարարել էր, թե երեխաներին պաշտպանելու համար անհրաժեշտ է ավելի խստացնել մուտքը պոռնոկայքեր:
