Քիչ առաջ Երևանում մեկնարկեց Հայաստան-Բելգիա գործարար համաժողովը և երկուստեք/B2B հանդիպումը: Այն կազմակերպել են Զարգացման հայկական գործակալությունը Բելգիա-Հայաստան Առևտրաարդյունաբերական պալատի հետ համատեղ:
Համաժողովը ենթադրում է Հայաստան-Բելգիա երկուստեք հանդիպումներ բելգիական և հայկական համապատասխան ոլորտների միջև: Բացման խոսքով հանդես եկան Բելգիա-Հայաստան Առևտրաարդյունաբերական պալատի նախագահ Վալերի Սաֆարյանը և ԶՀԳ գլխավոր տնօրեն Ռոբերտ Հարությունյանը: Նրանք տեղեկացրեցին, որ գործարար համաժողովն իրենից հիանալի հնարավորություն է ներկայացնում փոխշահավետ առևտրատնտեսական հարաբերությունների և երկուստեք համագործակցության ձևավորման համար:
Վալերի Սաֆարյանն ասաց, որ թեև Հայաստանը սեպտեմբերի 3-ին հայտարարել է ՄՄ-ին միանալու ցանկության մասին, Վիլնյուսին ընդառաջ Հայաստանը, միևնույն է, ունի տնտեսական մեծ պոտենցիալ:
Ռոբերտ Հարությունյանը բելգիական մասնակից ձեռնարկությունների ներկայացուցիչներին մանրամասնորեն ներկայացրեց, թե ինչով է ձեռնտու Հայաստանում ներդրումներ կատարելը: Նա հիմնական շեշտադրումն արեց լիբերալ տնտեսության և բաց տնտեսական քաղաքականության վրա: Նրա հավաստիացմամբ՝ ՀՀ-ում հստակ ապահովվում է ներդրումային անվտանգ դաշտը, քանի որ ներդրումների շահերի պաշտպանությունը ՀՀ առաջնահերթությունն է: Ռոբերտ Հարությունյանը նաև նշեց, որ Հայաստանի հետ համագործակցությունն ապահովում է ԱՊՀ երկրներ մուտք գործելու համար որոշակի դյուրացված ռեժիմների հասանելիություն:
«Մենք չունենք նաև սահմանափակումներ»,- ասաց նա՝ ընդգծելով, որ այս ոլորտում նրանց մեծապես կարող է օգնել հայկական մեծ սփյուռքը: Նրա գնահատմամբ՝ դա մեծ առավելություն է նոր կապեր հաստատելու և այլ առումներով:
Տեղեկացնենք, որ բելգիական մասնակից ձեռնարկությունները կներկայացնեն հետևյալ ոլորտներն ու ճյուղերը՝ շինարարություն, ֆինանսական համակարգ, դեղամիջոցներ, գորգերի և տան պարագաների արտադրություն, ատամնաբուժական ծառայություններ, կինեմատոգրաֆիա, միջոցառումների կազմակերպում, սպորտի ոլորտ: Տեղի կունենան 47 երկուստեք հանդիպումներ 37 հայկական ընկերությունների մասնակցությամբ համապատասխան ոլորտներում:
2012թ. Հայաստանի և Բելգիայի առևտրաշրջանառությունը կազմել է 200.9 մլն ԱՄՆ դոլար, որն աճել է նախորդ տարվա համեմատ 48.8%-ով: 2012թ. ՀՀ-ից Բելգիա է արտահանվել 127.1 մլն ԱՄՆ դոլար և Բելգիայից ՀՀ է ներմուծվել 73.8 մլն ԱՄՆ դոլարին համարժեք ապրանք: 2012թ. ՀՀ-ից Բելգիա է արտահանվել հիմնականում պղինձ և այլ իրեր, այդ թվում՝ բնական կամ արհեստական մարգարիտ, թանկարժեք կամ կիսաթանկարժեք քարեր, թանկարժեք մետաղներ, հանքաքար, խարամ և մոխիր, ձուկ և խեցգետնավորներ: Բելգիայից ՀՀ է ներկրվել հիմնականում բնական կամ արհեստական մարգարիտ, թանկարժեք կամ կիսաթանկարժեք քարեր, թանկարժեք մետաղներ, միջուկային ռեակտորներ, կաթսաներ, սարքավորումներ և մեխանիկական մասեր, կենդանական և բուսական ծագման յուղեր ու ճարպեր, սննդային ճարպեր, մեղրամոմ, դեղագործական մթերք: ՀՀ-ում Բելգիական կապիտալով գործում է մոտ 30 ընկերություն:
