Ձմեռային օլիմպիական խաղերի կրկնակի արծաթե մեդալակիր, աշխարհի և Եվրոպայի չեմպիոն գեղասահորդուհի Եվգենյա Մեդվեդևայի հայրը պատմել է աղջկա ազգանվան պատմությունը:
«Եվգենյայի ազգանվան փոփոխությունը կայացել է բացառապես իմ համաձայնությամբ: Եվ այդ պահի դրությամբ դա լավագույն միջոցն էր: Կարիք չկա ինչ-որ պատմություններ և պատճառներ փնտրել դրա մեջ: Հուսով եմ, որ ինձ կհաջողվի մեկընդմիշտ փակել այս թեման»,- Եվգենյա Մեդվեդևայի հոր` Արման Բաբասյանի խոսքը մեջ է բերում «Մոսկովսկի կոմսոմոլեցը»։
Բաբասյանը փաստել է նաև, որ բաժանումից հետո ինքը պահպանել է ընկերական փոխհարաբերությունները Եվգենյայի մոր` Ժաննայի հետ: «Որպես Եվգենյայի ծնողներ՝ մենք միշտ էլ շփվել ենք: Կցանկանայի ասել, որ Ժաննան հրաշալի մայր է»,-ասել է նա:
Եվգենյա Մեդվեդևան 23-րդ Ձմեռային օլիմպիական խաղերի կրկնակի արծաթե մեդալակիր է, 2016, 2017 թվականների աշխարհի և Եվրոպայի չեմպիոն, 2017 թվականի աշխարհի թիմային առաջնության փոխչեմպիոն:
