Շաբաթ օրը վարչապետ Կարեն Կարապետյանը այցելել էր Լոռու մարզ՝ ծանոթանալու 2017 թ. մարզի և համայնքների զարգացման ծրագրերի շրջանակում ըստ ոլորտների իրականացված միջոցառումների արդյունքներին ու 2018 թ. անելիքներին:
Այցի ընթացքում հաստատվել է 2017-2025 թթ. Լոռու մարզի զարգացման ռազմավարությունը, որը նախատեսում է ունենալ բազմաճյուղ, զարգացած արդյունաբերություն, արդիականացված գյուղատնտեսություն և զարգացած զբոսաշրջություն, ՏՏ ոլորտ։
Վանաձորի ավագանու «Լուսավոր Հայաստան» խմբակցության ղեկավար Քրիստ Մարուքյանը, սակայն չի հավատում, որ այս ռազմավարությունը իրատեսական է և այն կյանքի կկոչվի նշված ժամկետներում։ «Ես շարունակում եմ մնալ իմ կարծիքին, որ մենք չունենք ներդրումային միջավայր։
Ներդրումային միջավայրի համար պետք է ազատ մրցակցային դաշտ, ազատ մրցակցային հող, ամենապարզ մրցույթները իրականացվեն թափանցիկ։ Իսկ քանի դեռ մենք այդ ամեն ինչը չունենք՝ փողը հոսում է այնտեղ, որտեղ փողին ավելի ձեռնտու է։ Դա տնտեսագիտության կանոններից առաջինն է։ Իսկ այս ամենը հաշվի առնելով, կարող ենք ասել, որ Վանաձորում, Լոռու մարզում առայժմ ոչ մի նախադրյալ չկա»,- «Առաջին լրատվական»-ի հետ զրույցում ասաց Մարուքյանը՝ հավելելով. «Գիշերային լուսավորությունը, ճանապարհների վիճակը տարրական բաներ են, ասենք, տուրիզմի զարգացման համար, բայց հիմա մենք ուզում ենք տուրիզմը զարգացնել։ Նման միջավայրում ներդրողը գա ի՞նչ անի, չեմ հասկանում»։
Քրիստ Մարուքյանի խոսքերով՝ այսօր էլ դեռևս Վանաձորում մի քանի թաղամասերում տնակային ավաններ են գործում և, զարմանալի է, թե տնակային ավաններ ունեցող քաղաքի ռեսուրսները բաշխելուց ոնց են առաջնային համարում, ասենք, տուրիզմի զարգացումը։ «Առաջնահերթը քաղաքում առկա խնդիրները լուծելն է, որ երբ տուրիստը գա Վանաձոր, տեսնի քաղաք, որը հյուրընկալ է, որի արտաքին տեսքը խաթարված չէ այլանդակ շինություններով, գազոնները մշակված են, կա փողոցային լուսավորություն։ Սրանք պրիմիտիվ խնդիրներ են, որոնք մոռացած, գնացել «Դիսնեյլենդ» ենք կառուցում։ Որևէ կերպ այսօրվա Վանաձորի իրավիճակը չի համապատասխանում իրենց ամպագոռգոռ պլանների հետ»,- ընդգծեց Մարուքյանը՝ բերելով մի քանի օրինակ, որը վառ ապացույցն է այն բանի, որ սրանք զուտ անհեռատես խոսակցություններ են։
Օրինակ՝ Վանաձորի հիվանդանոցը, որը պետք է շահագործման հանձնվեր 2015 թվականին, հիմա նոր-նոր՝ 2018 թվականի գարնանը խոսք է գնում բացման մասին։ Կամ՝ տևական ժամանակ է խոսվում է Վանաձորում գազաբալոնների արտադրություն հիմնելու մասին, որի համար 20 միլիոն դոլարի ներդրում պետք է կատարվեր, 400 աշխատատեղ պետք է ստեղծվեր, բայց բացում անելուց և տարածք հատկացնելուց զատ, այլևս ոչ մի աշխատանք այդ ուղղությամբ չի կատարվել, որեւէ շինարարություն չի կատարվել, ոչ մի աշխատող աշխատանքի չի ընդունվել։ Մինչդեռ այդ արտադրությունը դեռևս սեպտեմբերից պետք է աշխատեր և արտադրանք թողարկեր անգամ Ռուսաստանի համար։ «Այսքանից հետո ես էլ ոնց հավատամ, որ Վանաձորում ներդրումներ են արվելու, և մարզը զարգանալու է։ Այսինքն՝ եթե Վանաձորում պետք է ներդրումներ կատարվեն, որոնք պետք է քաղաքում միջավայր փոխեն, ես էլի մնում են այն համոզմանը, որ դրանք պարզապես անհույս փորձեր են իրենց իսկ սխալները ուղղելու համար» Վանաձորի ավագանու անդամի խոսքերով՝ շատ զավեշտալի էր նաև այն փաստը, որ մարզպետը վարչապետին զեկուցում էր մարզում կատարված նույնիսկ այն աշխատանքները, որոնք իրենց հետ աղերս չունեն, մասնավոր սեկտորի կողմից կատարված աշխատանք է, որը, չգիտես ինչու, ներկայացվում էր որպես սեփական ձեռքբերում։ «Ու դա արդեն սովորություն է դարձել, երբ փորձում են այս կամ այն մարդու արածը ներկայացնել որպես իրենց ձեռքբերում, իրենց լավ աշխատանքի արդյունք, իրենց կողմից ներգրավված ներդրում։ Բայց, մեծ հաշվով, դա իրենց հետ ոչ մի կապ չունի»,- նշեց մեր զրուցակիցը։
Քրիստ Մարուքյանի խոսքերով՝ Վանաձորում, առհասարակ մարզի վրա այսքան արհեստական ուշադրություն է կենտրոնացվում՝ հաշվի առնելով նախորդ տարի ընտրություններում կատարված խայտառակ պատմությունը։ Իշխանությունները հասկանում են, որ Վանաձորում կատարվածը իրենց բոլորի ձախողումն է, ՀՀԿ-ի բոլոր մակարդակների ձախողումն է։ «Հիմա ժամանակ առ ժամանակ Վանաձոր գալով, այստեղ ինչ-որ հանդիպումներ կազմակերպելով, փորձում են ինչ-որ կերպ շտկել իրավիճակը, բայց ավելի հեշտ կլիներ՝ ի սկզբանե չխաթարել վիճակը, քան հետո փորձել ուղղել ինչ-որ մի բան, քանի որ այսօրվա վիճակը իրենց թույլ տված օրինազանցությունների հետևանք է։ Բայց դա կոսմետիկ շտկումներով չի շտկվի»,- եզրափակեց Մարուքյանը։
