Մարտի 5-10-ը նախատեսված է Հայաստան-ԱՄՆ բարեկամության խմբի այցը ԱՄՆ, մասնավորապես Վաշինգտոն և Նյու-Յորք, ինչը տևական ժամանակահատվածի համար առաջին այցն է Միացյալ Նահանգներ: Այս մասին «Առաջին լրատվական»-ի հետ զրույցում նշեց ԱԺ փոխնախագահ, ՀՀ ԱԺ Հայաստան-ԱՄՆ բարեկամական խմբի ղեկավար Արփինե Հովհաննիսյանը, ով, ի դեպ, գլխավորելու է հայկական պատվիրակությունը:
Նրա խոսքով՝ նախորդ տարի Հայաստան են այցելել այդ խմբի Armenian caucus-ի անդամները, ունեցել են մի շարք հանդիպումներ, նաև Արցախ են այցելել: Սա կարծես պատասխան այցն է։
«Այցի ընթացքում նախատեսված են հանդիպումներ ինչպես ԱՄՆ Կոնգրեսում, Սենատում, այնպես էլ պետքարտուղարությունում: Բավական հագեցած օրակարգ է: Առավելապես քաղաքական բաղադրիչը կլինի օրակարգում, ինչպես նաև կլինեն հանդիպումներ հայ համայնքի հետ»,-ասաց Արփինե Հովհաննիսյանը:
Անդրադառնալով հայ-ամերիկյան օրակարգի բացակայության մասին պնդումներին՝ նա ընդգծեց. «Կարծում եմ՝ մենք մեծ ներուժ ունենք հայ- ամերիկյան օրակարգը լրացնելու տեսանկյունից: Ունենք որոշակի հարցեր, որտեղ կա որոշակի համագործակցություն, տարբեր ձևաչափերով, բայց գլոբալ առումով, քաղաքական տեսանկյունից կարծում եմ՝ կան հարցեր, որոնց ուղղությամբ արժե, որ կողմերը խորացնեն համագործակցությունը: Մեր այցը այդ առումով լավ խթան կլինի»:
Դիտարկմանը, որ տարեցտարի ԱՄՆ օգնությունները տարբեր երկրներին նվազում են, այդ թվում Հայաստանին, արդյոք դա հենց հայ ամերիկյան օրակարգի բացակայության հետ չի կապված, ԱԺ փոխնախագահը պատասխանեց. «Դա նախևառաջ ամերիկյան վարչակազմի մոտեցումների դրսևորման արտահայտություն է, օգնությունների բյուջեի կրճատումը միայն Հայաստանի դեմ ուղղված չէ, հատկապես, քննարկումների արդյունքում որոշակի գումար այդուհանդերձ, նախատեսվեց: Մենք եթե կարողանանք խորացնել մեր հարաբերությունները և հստակ ծրագրեր նախատեսել, բնականաբար, այդ ծրագրերի շրջանակում բյուջետային հատկացումները կամ առհասարակ տարբեր ծրագրերով ֆինանսավորումներն ավելի բարձր մակարդակի և նոր որակի կբարձրացնենք: Սա կապված է փոխգործակցության ակտիվացման հետ»:
Արփինե Հովհաննիսյանը չի կիսում տեսակետը, թե Հայաստանը քաղաքական առումով ԱՄՆ-ին ոչինչ չունի առաջարկելու, և տնտեսական բաղադրիչը պետք է խորացնի: «Չեմ կիսում այդ տեսակետը: Կարծում եմ՝ Հայաստանը բարեկամական հարաբերություններ ունի ԱՄՆ-ի հետ և դրա համար մի շարք գործոններ կան: Տնտեսական բաղադրիչի առումով կարևոր էր կրկնակի հարկումը բացառող համաձայնագրի հետ կապված զարգացումները: Այնպես որ կարելի է տնտեսական համագործակցությունը խորացնելու եզրեր գտնել»:
